الدموع هي الانسان قالوا منذ قديم الزمان... ان الدموع هي الانسان...عند الأسى يعبر بها عن الاحزان... وعندما يبتسم له الزمان...يذرفها فرحة وامتنان...وفي كثير من الأحيان...
هي دليل الشقاء والحرمان...ولكنها قليلا ما تكون دموع حب وامان...ونادرا نادرا ما نبكي امتنانا او عرفان...ليس لأننا افتقدنا للتقدير والاحترام...ولكن لان من يمنح الحب اصبح يداس تحت الأقدام...فأصحبت الدموع هي الانسان...وهناك الحب ذل واستعباد وكرامة تهان...والغش والزيف والخداع هم سر الاطمئنان...كيف؟؟؟ لا ادري !! ولكن ما اقره قلبي ...ان الدموع هي الانسان...وان الانسان بلا دموع بقايا انسان....

الاثنين، 11 يوليو، 2011

فرحى يوم السبت 16-7


انا جايه مش عارفه ابدا منييييييييييين

الاول بجد بجد هتوحشونى كتيييييييييييير والله السنتين اللى قضيتهم هنا كانو احلى سنتين اتعرفت على اخوات واصحاب بجد


اتعلمت حاجات كتيييييييييييير لقيت ناس شاركتنى حزنى شركتنى فرحى


نفسى اكتب اسم مدونة مدونة بس خايفه انسى حد


دعواااااااتكم ليا ولزوجى


عايزة اقولكم انه انسان ورجل بمعنى الكلمه مش عشان هو بقى زوجى بس بجد من اول يوم شفته فيه وانا لمحت فيه دا وكل يوم ثقتى بتذيد فيه اكتر

انسان لقيت فيه كل اللى بحلم بيه واهم شىء انه انسان يخاف ربنا

بقوله ربنا يخليك لييياااا وميحرمنيش منك ابدا



انا عمرى ماهنسى حد فيكم بجددد

واتمنى انكم تفتكرونى دايما بالخييييييييييييير

واسمع احلى زغروووووووووووووووووووووووطه تهز مصر كلها



الجمعة، 24 يونيو، 2011

ملكه متوجه



وضعت اخصائية التجميل اخر لمساتها فى تزيين لميس لتصبح اجمل عروس رأتها اعين الحاضرين فى المركز حتى هى لم تعرف نفسها فجاملها فاق الحدود

عندما نظرت للمرآه وجدت نفسها ملكه متوجه ابتسمت وطار قلبها فرحا فبعد دقائق ستصبح ملكا لحبيبها الذى ظلت تحبه فى صمت لسنوات حتى فاز قلبها به

وجائت لحظة الرحيل اخبرتها صديقاتها ان حبيبها منتظرها فى الخارج ينتظرها بشوق ولهفه دق قلبها واستعدت للخروج وما ان رآها حتى ظل ينظر لها منبهر بجمالها الساحر الذى لم يعهد ان رأى مثله ....ثم همس فى أذنها ((اين كنتى تخفين هذا الجمال )) ثم انزلت ستارا خفيفا على وجهها حتى لا يراها احد غيره

وضعت يدها فى يده وخرجا وعلا صوت الهتاف والتصفيق والزغاريد
ثم ركبا السياره ....هو لم يدع لحظه تفوق دون ان ينظر لها ويغازلها ويتأمل جمالها فالأن هو ايضا فاز قلبه بقلبها هو ايضا احبها فى صمت لسنوات رضاءا لربه وما انا اتاحت الفرصه حتى ذهب لخطبتها وهى الان زوجته لمعت عيناه وكادت دموعه ان تسقط فرحا .....وصلا الاثنان عش الزوجيه الذى لطالما حلما به سنوات

وبعد التهنئه والتبريك وبعد ان ذهب الجميع لم يبق سواهم امسك يدها بحنان وقبلها ثم قاما وصلى الاثنان شكر لربهما على هذه النعمه الكبيره حمدا ربهما لانه عوض صبرهما خيرا فهم على يقين ان من ترك شىء لله ابدله الله خيرا منه

ثم قام بتشغيل بعض الموسيقى الهادئه ومد يده لها ليرقصا على هذه النغمات الرومانسية ابتسمت وقامت ليبدأ قلبها بالعزف على اوتار الحب

ووضعت يدها على كتفيه وبدأت تتمايل مع النغمات ثم ووضعت راسها على كتفيه وادمعت عيناها فهى لم تصدق انها اليوم معه وبين يده حمدت ربها اغمضت عيناها ودموع الفرح تسيل على وجنتيها وهى تتذكر يوم ان صرح لها بحبه ولكنه بعد فتره حدثها بأنه لابد ان يبتعدا رضاءا لربه لايريد ان يفعل شىء يغضبه حدثها ان ربه سوف يبارك لهما اكثر فى زواجهم وظلا هكذا حتى جاء لخطبتها طار قلبها فرحا فبعد كل هذا العناء وبعد طوال البعد اليوم هى معه وبين احضانه اخذت نفسا عمييقا وحاولت اخفاء دموعها

:

:

:

:

:

ثم افاقت من شرودها لتجد نفسها امام اتيليه لتأجير فساتين الزفاف

وتجد صاحبه ينظر لها بحنان ويحدثها بلهجه ابويه (((لدينا العديد من التشكلات بالداخل ان اردتى اخذ نظره )))

ابتسمت ودق قلبها ووضعت يدها على خاتم خطبتها وكأنها تحتضنه واخذت تتحسهه وتقبله بين اصبعها

وقالت

قريبا ان شاء الله سأتى الى هنا .............

الأربعاء، 4 مايو، 2011

احلى حضن ^_^ +++ تحديث


دعواتكم ورايا حفله النهارده ادعولى تعدى على خير الحفله دى فى حضانتنا بس انا برضو اللى ماسكه فقرات فى المسرح زى يوم اليتيم كدا

خايفه جدا لان الاطفال مش عارفه شاربين ايه ههههه تدربهم من هنا تتلفت بس ترجع تقولهم يلا تلاقيهم متنحين ههه

وكمان دعواااااتكم التيرم دا يعدى على خييييير

ونسلم مشروع التخرج اللى مش راضى يخلص :(:(

وقريب قوى قوى قوى قوى هقولكم على اخبااار هتفرحكم كلهم ^_^

****************************

نروح بقى لموضوعنا

عمرك مره حسيت طعم انك تكون مخنوق وماشى شايل هموم الدنيا

وعمال تفكر وقلبك خلاص هيبكى وسرحان فى كل حاجة حواليك وبتقول من قلبك يااااااااااااااااارب وفجأه تلاقى حد لاتعرفه ولا يعرفك وانت معدى من قدامه بيقولك ربنا يريح قلبك وييسر امرك وينولك كل اللى تتمناه او حد بيقول حتى لو مش ليك والله هتفرج بس انت متشليش هم .......
اوكنت بتفكر فى مشكله او موضوع ومش عارف تعمل ايه وبتدعى ربنا وتكون فاتح قناه المجد او اذاعه القران الكريم وتلاقى آيه بتثبتك وكأن ربنا بيقولك اصبر .. توكل ..لاتخف
عمرك مرة كنت بتقول لنفسك حاجة او بتحاسبها على حاجة وبتقلب فى القنوات تلاقى محاضره عن نفس الموضوع اللى كنت بتكلم نفسك فيه او هنا على المدونة او الفيس نوت بتتكلم عن حاجة انت كنت بتفكر فيها او فى المسجد او مع اصحابك
او مرة مش عارف تاخد قرار فى حاجة تعملها وفجأه تلاقى صاحبك بيقولك ماتيجى نعمل كذا
كتييييييييييير بتحصل الحاجات دى
عارفين الاحساس ساعتها ايه بجد بحس انى طايره بحس ان ربنا هو اللى بيكلمنى وقتها بدمع معرفش ليه
دا كله دليل ان ربنا بيحبك والله بيحبك
على رغم اننا كتير بنكون بعاد عنه
على رغم اننا كتير بنعصاه
بس صدقونى لو مرة واحده قولت يارب بتلاقيه جنبك
عارفين انا لما بيحصل معايا كدا بحس ان ربنا بيحضنى قوووووى
خاصه وقت الازمات والله فكروا كدا للحظه ربنا بيبعتلنا رسائل كتير بيوجهنا منا اللى فعلا بيغتنمها ومنا اللى مبيبصلهاش
بحس بإسم الله
الكريييييييم
الودووود
الحفيييييظ
السميييييييع
القرييييييب
بجد بهنى اللى بيحس باللحظات دى

عارفين انا حسيت حضن ربنا امتى بجد

يوم لما كان فاضل 6 ايام على فرحى ومحصلش نصيب لانه بيحبنى

يوم لما عرفت حقيقه الشخص اللى كنت مرتبطه بيه

يوم لما الكل بيقولى انت اتجننتى ياتغريد عايزة تفركشى كل حاجة ويبقى اسمك مطلقه وانا كل مااحن الاقى ربنا بيبعتلى رسايل تقوينى وتثبتنى على موقفى

يوم لما هو مكنش راضى ويقول لااا بكل جبروت مش هسيبها ودى كدا مراتى ومش هطلق والكل فاقد الامل

وانا مش بقول غير يارب ....قلبى كان فيه سكينه كبيره قوى

والله يوم الموضوع دا ماانتهى لقيت ايه بتقول

وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ

يوم لما كان حد ييجى يقول كلمه عليا والاقى الف واحد يرد ويدافع عنى

دى اكبر ازمة مريت بيها فى حياتى وبجد حسيت بحب ربنا ليا وحسيت بحضنه اللى بجد مفيش احلى منه حضن يخليك تنسى كل هم حضن يفرج كل كرب حضن يخلى قلبك دايما راضى

************************

عمرك حسيت بحضن ربنا

وامتى ؟!

*******************
لو في يوم كان الحمل عليك ثقيل
وتايه لوحدك مش لاقي دليل
والهموم تخلي الليل طويل
وترميك في غربة ومرارة وويل
مد إيديك تلقاه دايما حواليك
هو الله قبلك حاسس بك
إن شاء الله... إن شاء الله... إن شاء الله

حتلاقي الطريق

لو في يوم خدتنا معاصي أو ذنوب
وخافت قلوبنا ما تقدر تتوب
وتشكي الروح ومين بالسر ليه نبوح
ومين اللي يقدر يداوي الجروح
مد إيديك تلقاه دايما حواليك
هو الله قبلك حاسس
بك إن شاء الله...شاء الله... إن شاء الله

حتلاقي الطريق .

قول يا الله دا عنك مش بعيد
متشلش هم ولا تشعر بضيق
قول يا الله إهديني . يا الله عشان اتوب
إمحي الذنوب و إهديني الطريق..
نورلي الطريق...نورلي الطريق....
إن شاء الله...شاء الله... إن شاء الله

حتلاقي الطريق



اختكم فى الله تغريد احمد

الجمعة، 22 أبريل، 2011

البراغيث الشتوية


اليكم اخر الانباء

الواد شلاطه بن ام فاروق نزل بعد العصر وجمع محسن وشيكو ومرتضى ومنصور اولاد بثينة وفكيهه وشمس وفايزة

ولفوا جمعوا قش

وعملوا كومه كبيييره وكبوا جاز وولعو فى القش

ونط يامعلم وهش البراغيث

الاولى بسمله والتانية وبسمله والثالته بسمله

بتعمل ايه ياولااااااااااااا

بنط يامااا خلى البراغيث تطلع

حاسب ياولا لتقع

وفجأه وعلى حين غره رقعت ام شعبان بالصوت

يالااااااااااااااااااااااااااهوى ربنا يهدكم خليتم الغسيل هباااااب

وهب جابت جرد المية وتش عليييييهم من البلاكونه

والى هنا تنتهى نشرتنا الاخباريه

هذا هو مشهد يتكرر كل عام

البراغيث الشتوية

حد سمع قبل كده عن الاسم ده؟؟؟؟؟؟!!!

دى لعبه عندنا اول ما الربيع يدخل كدا ويهل علينا تلاقى الشوارع كلها مليانه قش اسود ومتبهدله

وتلاقى العيال مجمعيين قش ويحطوه ف الشارع ويولعوا فيه..وبالدور بقى كله يننط فوق القش..

اللى يقع بقى ف النار واللى ينط..كل واحد وحظه :)

اعتقد محدش عنده العاده دى غيرنا!!!!!!!

لى بقى ذكريات كتيير فاللعبه دى او الحدث الههياوى العظيم ده..

زمان وانا صغيرة طبعا احنا مبنحتفلش بشم النسيم فبابا عشان ميزعلناش كان يخرجنا يوم الجمعه نروح جنينة ونلعب ونطنطط وانا راجعه الاقى العيال قدام البيت مولعين وبينطوا

وحياتى عندك يابابا عايزة العب

لا طبعا مينفعش اخاف عليكى

عشان خاطرى

يابنتى خطر

يابابا اشمعنى هما

طب اجرب مره واحده بس انط نطه

وبعد جدال طبعا والزن على الودان بقى

نطيت النطه ومتنتهاش ههههه تانى

بس امووووت واعرف العادات دى بنجيبها منيين ومعناها ايه؟؟؟؟؟؟؟

الأحد، 17 أبريل، 2011

دبسنى دبس :D مع تاج الثورة


طبعا التدبيسه دى من استاذى الفاضل ماجد القاضى

بأمر وقرار جمهورى انى لازم اجاوب فطبعا لازم اجاوب تلميذه لازم تسمع كلام استاذها :D

*** هل توقعت ثورة 25 يناير؟

عايزين الحق ولا ابن عمه ....طبعا لاا والف لا

دا حتى لما قالو هنطلع كلنا يوم 25 كنت بتريق عليهم انا قلت مجرد مظاهرة عادية وهيتلم فيها الحبايب كلهم ويشرفوا بطرة كالعادة لا عمرى تصورت اننا نقوم ونكون ايد واحده كدا ولاعمرى تصورت ان هيحكمنى حد غير عفروتو اصلا انا كنت فاقده الامل فى الشباب ...... كنت ببكى من قلبى على حال البلد واقول فيييينكم يااحفاد احمد عرااابى .........بس اللى كنت متأكده منه ان لازم يوم البركان ينفجر .

وهل كنت من ثوار ميدان ( التحرير - الكنبة - الكمبيوتر - حدد الميدان الآخر الخاص بك)

الكمبيوتر ..وحبه الكنبه...وعمرو افندى :D دا كان ميدان التحرير بتاعنا فى الزقازيق

كان نفسى جدااا اروح ميدان التحرير بس كله خيييييييير

*** مالم تنجح الثورة في تحقيقه هو ....................( اختار شيئا واحدا)

حرية الاعلام

ان الثقه ترجع تانى بين الشعب والشرطه وخاااااصه المرور

وان مازال فيه ناس بتشكك فى بعضها ودا ادى الى انقسام .....انت معايا تبقى حبيب مش معايا تبقى عدو

*** أكثر شىء فرحك في هذه الثورة هو .........................( اختار شيئا واحدا

ان القرضاوى ام المصلين يوم الجمعه فى ميدان التحرير كان اجمل منظر شوفته فى حياتى

اكتشفنا اننا بنحب البلد دى بجد وبنعشق ترابها وهنضحى بعمرنا عشانها

ان كل دول العالم عرفت مين هو المصرى وخلاص رجعتله قيمته وهيبته الضائعه

ان خلاص كل واحد شال اللزقه وصرخ بأعلى صوت لا للظلم

*** الشخصية التي أعجبتك خلال الثورة

كل شخص نزل وقال كلمه حق ......كل واحد عرف هو عايز ايه وليه .....مش ماشى مع اللى ماشى وخلاص ومعاهم معاهم عليهم عليهم

*** الشخصية التي احتقرتها بسبب الثورة

الاعلاااااااااااامييييييييييين اللى مكنوش بيقوموا بدورهم بأمانة واللى فعلا ميعرفوش يعنى ايه شرف المهنه ........واكتر حاجه كنت بحترقها الفنانين ياربى لما كنت اسمع منهم حد بيتكلم ويدافع عنه حاجه تشل

*** أطرف ما سمعته خلال الثورة ؟( تعليق _ نكتة _ حدث _ أخرى (

ياسوزان خافى عليه هنجبهولك من رجليه

واللى عجبنى جدا مستر نانا ^_^

*** القناة التي تابعت من خلالها أحداث الثورة هي

الجزيرة والعربية ........

وساعات كنت بجيب المصرية عشان اتفرج على منظر النيل :D

*** الجريدة التي كنت تقرأها لتتابع الثورة هي

المصرى اليوم ومازلت اقراها

واحيانا الدستور

اليوم السابع الكترونيا

*** الكاتب المفضل خلال الثورة هو

فهمى هويدى

بلال فضل

مجدى الجلاد

*** المذيع (المذيعة) المفضل خلال الثورة هو

مفيش تقريبا كنت بحب اقل فى القنوات كلها واسمع

بس كنت بحب جدا مذيعين الجزيرة

وميسون فى العربية ^_^

*** كلمة تقولها لشهداء وجرحى 25 يناير

بغبطكم بجد على النعمه دى واحسبكم كذلك ولا اذكى على الله احد

كنت اتمنى اكون معاكم وربى يعلم كنت بتمناها قد ايه بس ان شاء الله هتكون الشهاده فى المسجد الاقصى قريييييييب

وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ

دمكم عمره ماهيضيع هدر


***
متقولش إيه إدتنا مصر وقول حندي إيه لمصر

عندك حاجة تديها لمصر ؟

مجهودى ....انا تعهدت انى كل حاجة هتعلمها هعلمها للناس ..

ولو شوفت اى غلط عمرى ماهسكت حتى لو صغيره ومتستاهلش

يعنى افتكر من يومين كنت ماشيه ولقيت واحد رمى كيس شبسى فى الارض اخد الكيس وقولتله لو سحمت احنا تعبنا فى نظافه البلد دى ياريت متوسخهاش طبعا هو بصلى بذهول وابتسم ومشى هههه بس انا فرحت انى كنت ايجابيه

*** من سترشح لرئاسة الجمهورية ؟ ولماذا ؟

ازاى ارشح حد وانا معرفش برنامجه ايه .....لكن اتمنى يكون متدين فى المقام الاول انسان بمعنى الكلمة فى المقام الثانى

** لو أصبحت رئيسا لمصر ما هي أول ثلاث قرارات لك ؟

التعليم ثم التعليم ثم التعليم دا اهم حاجة والله لازم نفكر فيها لو عايزين البلد دى تنهض صح لازم يكون التعليم صح مش بياخدوا سمك لبن تمر هندى

عمرى ماهعمل لاى حد كارت ارهاب وهخلى اى حد يقول رأيه بكل صراحه عمرى ماهكبت حرية حد ادام مش هيضر البلد ولا بيخالف تعاليم ربنا

لاااااازم يكون فيه عداله فى توزيع الاجور

بس فى كل الاحوال ودا مش هيحصل يعنى انى اكون رئيسه جمهوريه ....بس مفيش مانع انى احلم ^_^ ....عمرى ماهوافق لانها مسئوليه كبيييييييره جدا

كلكم راع وكلكم مسئول عن رعيته وانا هكون مسئوله عن ملايين وحسابى هيكون عسير لو قصرت فى حق حد ولو حصل عمرى ماهدوق الراحه

*** لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال ؟

ياصلاة النبى معتقدش ان الفلوس دى تتوزع علينا

وبصراحه لو فعلا هيحصل انا مرضاش لان كدا كدا الفلوس هتتصرف فلو استثمرناها فى مشروعات تنموية مشروعات تخفف نسبة البطاله وتنمى البلد دى يبقى افضل بكتييييييييير

التاج دا لو ههديه فههديه لاى حد يقراه واى حد يكتبلى تعليق ودا اجبااااااااااااار

الأربعاء، 13 أبريل، 2011

همسـااات


عيناها : الى متى سيظل حبنا سجين اعيننا
عيناه : ليتنى اسجن فى عينك الى الابد

عيناها : الا تخاف ان تغرق فى دموعى
عيناه : ليتنى استطيع اذا لغسلت احزان عمرى

عيناها : اريدك ان تبوح لى بحبك
عيناه : يكفى ان ترينه فى عينى

عيناها : ولكن اريد ان اسمعها منك
عيناه : الصمت ابلغ فى التعبير عن الحب

عيناها : متى يرى حينا النور متى ستعلنه الى العالم
عيناه : حبنا اكبر واعمق من ان نتحدث عنه

عيناها : لا اريد العيش فى الظلام لا استطيع
عيناه : الا تكفى ان تنطق عيناى بحبك

عيناها : لا اريد ان اسمعك وحدى اريد ان يسمعك من حولى
عيناه : حبنا فلفسه صعبه لن يفهما احد

عيناها : لماذا تتلاعب بعواطفى لا ارى غيرك

حولى ولكن لا املك الا ان اصدقك
عيناه : لانك تحبينى

عيناها : الى متى تتهرب من الواقع
عيناه : هذا الواقع اكرهه واريد ان اعيش فى الخيال

عيناها : ماذا تقصد ؟؟؟ هل حبنا مجرد خيال !!!
عيناه : لا ولكن نريد ان نصبر

عيناها : على اى شى
عيناه : الى ان يأتى الوقت وبنبسط حبنا على ارض الواقع

عيناها : إلى متى !!!
عيناه : قريبا حبيبتى ...قريبا سألعلن للعالم اجمع انى احببتك من صميم قلبى

ثم يغمض عيناه


بقلمى : تغريد احمد

11/5/2009

الاثنين، 4 أبريل، 2011

ماتكبيش الجردل باام شعبااااان



طبعا انا مش هحكى على المطر النهارده احنا كنا راكبين العربية ومن علو المية دخلت جوه
تبص فجأه تلاقى المية داخله من الشباك
بس ايييييييييييييييييييييييه بقى
بعد المطر...
خلص المطر خلاص الحمد لله...
كل الناس بقى ..استعنا على الشقا بالله
هيلااا هوب كله شايل الحلل والجرادل وكل أداه ممكن تشيل ميه وعلى فييييييين.؟
على السطوووووح دقت ساعة العمل..

على فين يام ابراهيم؟؟؟طالعه السطح ياختى اشيل الميه ..طيب ياختى هابقلك فوق انا كمان هاخد العيال واطلع..

وقت المطر ده ..عندنا بيكون موسم ياعينى للعيال اللى مبتروحش البحر ف الصيف يصيفوا..
يطلعوا فوق السطوح أو ينزلووا الشوارع ويشمروا هدومهم ويدوا غطس ف المية..
نرجع بقى للحلل والجرادل..
الكل إستعد وأخد أدواته وحلله وسلطاته وطلع فوق السطح ..كله بالجرادل يملى ميه وطاااااااااااااااااااااااااااااااااااااااااااش ف الشارع يملى ميه وتتتتتتتتتتتتتتتشتشتشتشششششششش ف الشارع..

**
ف ناس بقى مريحه نفسها وعامله مواسير كده منها لنفسها بتكب ف الشارع ..راحه ع الاخر توماتيكى توماتيكى..

وطبعا متسألوش ..طب ما كده هيبهدلوا الشارع قدام بيتهم؟؟
عيب على ذكائكم تسألوا السؤال ده..كل واحد بيكب ف الشارع اللى جنبه مش قدامه بوابته...اومال يعنى يعك الدنيا قدامه؟؟
وهكذا كل واحد ف الشارع اللى جنبه والناس تولع بقى..

الحاجه بقى الفظيعة اللى حصلت انهارده..
=========================
النور قطع ف شارعنا..طب الحمد لله الناس بقى هتتلم وتبطل ترمى ميه..
برده كان عيب على ذكائى اتوقع هذا التوقع..
بالعكس...المية كتتتترت أكتر من الأول..زى ما يكونوا بيجيبوا من الحنفيات وعاملين مسابقه مين يكب أكبر عدد من الجرادل.....

وفجأه وبدون سابق إنذار..تسمع صويت من تحت البلكون..
انتم يا ............................. ياللى فووووووووووووووووووق انتم اتعميتوا ف عنيكم (طبعا اتعموا النور مقطوع ياعم )مش تبصوا ف الشارع قبل ماتتهببوا تكبوا ميه
يا .......يا...........يا.....................(تيييييييييييييييييييييييييت......(عيب الرقابه شالت الشتايم )
وفكرك بعد ده كله ام شعبان تبطل كب ميه...حاشا لله وكأن شئ لم يحدث ..
ويتوالى السباق تش طاش تش تش طااااااااااش (نغمات موسيقيه يااخواتى)

..
ف الاخر اضطر رجال شارعنا الشهمييين..يينزلوا ويلبسوا لبس الغواصيين ويفتحوا البلاعات...
لأن العيال افتكروه بسيين ونزلوا بالمايوهات والعوامات فأهلهم خافوا عليهم من البلهارسيا..



سؤال بسيط؟؟؟
انتم ليه بترموا المية ف الشارع يعنى هى مطرت ع السطوح بس وممطرتش ف الشارع؟؟؟
طب ليه محدش اخترعلنا حاجه نستفاد بالميه دى بدل ماتضيع كده؟؟

الشارع صووووووووت وقال ارحمووووووووووونى..

والله يسامحك ياام شعبان.. انك سمعتى كلام ام فتحى وام فاروق
:))