الدموع هي الانسان قالوا منذ قديم الزمان... ان الدموع هي الانسان...عند الأسى يعبر بها عن الاحزان... وعندما يبتسم له الزمان...يذرفها فرحة وامتنان...وفي كثير من الأحيان...
هي دليل الشقاء والحرمان...ولكنها قليلا ما تكون دموع حب وامان...ونادرا نادرا ما نبكي امتنانا او عرفان...ليس لأننا افتقدنا للتقدير والاحترام...ولكن لان من يمنح الحب اصبح يداس تحت الأقدام...فأصحبت الدموع هي الانسان...وهناك الحب ذل واستعباد وكرامة تهان...والغش والزيف والخداع هم سر الاطمئنان...كيف؟؟؟ لا ادري !! ولكن ما اقره قلبي ...ان الدموع هي الانسان...وان الانسان بلا دموع بقايا انسان....

الأربعاء، 4 مايو 2011

احلى حضن ^_^ +++ تحديث


دعواتكم ورايا حفله النهارده ادعولى تعدى على خير الحفله دى فى حضانتنا بس انا برضو اللى ماسكه فقرات فى المسرح زى يوم اليتيم كدا

خايفه جدا لان الاطفال مش عارفه شاربين ايه ههههه تدربهم من هنا تتلفت بس ترجع تقولهم يلا تلاقيهم متنحين ههه

وكمان دعواااااتكم التيرم دا يعدى على خييييير

ونسلم مشروع التخرج اللى مش راضى يخلص :(:(

وقريب قوى قوى قوى قوى هقولكم على اخبااار هتفرحكم كلهم ^_^

****************************

نروح بقى لموضوعنا

عمرك مره حسيت طعم انك تكون مخنوق وماشى شايل هموم الدنيا

وعمال تفكر وقلبك خلاص هيبكى وسرحان فى كل حاجة حواليك وبتقول من قلبك يااااااااااااااااارب وفجأه تلاقى حد لاتعرفه ولا يعرفك وانت معدى من قدامه بيقولك ربنا يريح قلبك وييسر امرك وينولك كل اللى تتمناه او حد بيقول حتى لو مش ليك والله هتفرج بس انت متشليش هم .......
اوكنت بتفكر فى مشكله او موضوع ومش عارف تعمل ايه وبتدعى ربنا وتكون فاتح قناه المجد او اذاعه القران الكريم وتلاقى آيه بتثبتك وكأن ربنا بيقولك اصبر .. توكل ..لاتخف
عمرك مرة كنت بتقول لنفسك حاجة او بتحاسبها على حاجة وبتقلب فى القنوات تلاقى محاضره عن نفس الموضوع اللى كنت بتكلم نفسك فيه او هنا على المدونة او الفيس نوت بتتكلم عن حاجة انت كنت بتفكر فيها او فى المسجد او مع اصحابك
او مرة مش عارف تاخد قرار فى حاجة تعملها وفجأه تلاقى صاحبك بيقولك ماتيجى نعمل كذا
كتييييييييييير بتحصل الحاجات دى
عارفين الاحساس ساعتها ايه بجد بحس انى طايره بحس ان ربنا هو اللى بيكلمنى وقتها بدمع معرفش ليه
دا كله دليل ان ربنا بيحبك والله بيحبك
على رغم اننا كتير بنكون بعاد عنه
على رغم اننا كتير بنعصاه
بس صدقونى لو مرة واحده قولت يارب بتلاقيه جنبك
عارفين انا لما بيحصل معايا كدا بحس ان ربنا بيحضنى قوووووى
خاصه وقت الازمات والله فكروا كدا للحظه ربنا بيبعتلنا رسائل كتير بيوجهنا منا اللى فعلا بيغتنمها ومنا اللى مبيبصلهاش
بحس بإسم الله
الكريييييييم
الودووود
الحفيييييظ
السميييييييع
القرييييييب
بجد بهنى اللى بيحس باللحظات دى

عارفين انا حسيت حضن ربنا امتى بجد

يوم لما كان فاضل 6 ايام على فرحى ومحصلش نصيب لانه بيحبنى

يوم لما عرفت حقيقه الشخص اللى كنت مرتبطه بيه

يوم لما الكل بيقولى انت اتجننتى ياتغريد عايزة تفركشى كل حاجة ويبقى اسمك مطلقه وانا كل مااحن الاقى ربنا بيبعتلى رسايل تقوينى وتثبتنى على موقفى

يوم لما هو مكنش راضى ويقول لااا بكل جبروت مش هسيبها ودى كدا مراتى ومش هطلق والكل فاقد الامل

وانا مش بقول غير يارب ....قلبى كان فيه سكينه كبيره قوى

والله يوم الموضوع دا ماانتهى لقيت ايه بتقول

وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ

يوم لما كان حد ييجى يقول كلمه عليا والاقى الف واحد يرد ويدافع عنى

دى اكبر ازمة مريت بيها فى حياتى وبجد حسيت بحب ربنا ليا وحسيت بحضنه اللى بجد مفيش احلى منه حضن يخليك تنسى كل هم حضن يفرج كل كرب حضن يخلى قلبك دايما راضى

************************

عمرك حسيت بحضن ربنا

وامتى ؟!

*******************
لو في يوم كان الحمل عليك ثقيل
وتايه لوحدك مش لاقي دليل
والهموم تخلي الليل طويل
وترميك في غربة ومرارة وويل
مد إيديك تلقاه دايما حواليك
هو الله قبلك حاسس بك
إن شاء الله... إن شاء الله... إن شاء الله

حتلاقي الطريق

لو في يوم خدتنا معاصي أو ذنوب
وخافت قلوبنا ما تقدر تتوب
وتشكي الروح ومين بالسر ليه نبوح
ومين اللي يقدر يداوي الجروح
مد إيديك تلقاه دايما حواليك
هو الله قبلك حاسس
بك إن شاء الله...شاء الله... إن شاء الله

حتلاقي الطريق .

قول يا الله دا عنك مش بعيد
متشلش هم ولا تشعر بضيق
قول يا الله إهديني . يا الله عشان اتوب
إمحي الذنوب و إهديني الطريق..
نورلي الطريق...نورلي الطريق....
إن شاء الله...شاء الله... إن شاء الله

حتلاقي الطريق



اختكم فى الله تغريد احمد

هناك 22 تعليقًا:

همسات وبحــ الحياه ــر يقول...

عايزة اقولكم طول مااحنا ماشين وراضين بكل حاجه تحصلنا عمرنا ماهنحس بأى هم فى حياتنا

صدقونى لانى كنت على يقين ان كل حاجة بتحصلى خير عمرى ماندمت للحظه على اى قرار اخده بعد مااستخير ربنا

وصدقونى بتعدى الايام وبتلف وتلاقى كل حاجة بتحصلك هى الخير
وان ربنا منع عنك خير دلوقتى عشان هو شر ليك قدام

ربنا يحببببببببكم جميعا
ويقدرلكم الخير

لــــ زهــــــراء ــــولا يقول...

" انا هقولك على حتة موقف يالهوي شعري وقف وجسمي قشعر منه ...كنت بتكلم انا وصديقة ليا ولاقتها منهارة وروحتلها البيت وهدتها وبصيت للسماء لاقتها بتقولي هو ربنا سامعني وانا بشتكيلك ( تقصد بتشتكي من جوزها) قولتلها والله سامعك وشايفنا
حلمت في نفس اليوم ايه واحد قالها اقري سورة المجادلة او قد سمع

راحت جاتني جري وفتحنا القرأن نقرأ
السورة دموعي نزلت من عيوني
واحنا بنقرأ
"{قد سمع الله قول التي تجادلك في زوجها وتشتكي إلى الله، والله يسمع تحاوركما إن الله سميع بصير}."

متتخيليش حالنا كان عامل ازاي وانا بكلمك الان الادان بيقولي الله اكبر
في كل وقت رسايل بس مين يفهم
(:
لولا

شوية قهوة يقول...

ازيك يا جميل
انتي فين متغيبة بقالك فترة قلقتيني عليكي
فعلا كتير بتحصل حاجة زي كدة زاحياناكمان لما ببعد فترة عن ربنا بيحصل حاجة تفكرني وترجعني تاني وبجد فعلا كتير بحس ان ربنا عيزني اكون انسانة كويسة
يا رب ثبتنا على الطريق المستقيم

اللهم امين

الازهرى يقول...

عندى واحد من زمايلى كان بيصحى كل يوم الصبح يفتح المصحف وأول آية تقابله بالصدفة يلاقيها بتوصف حالته
مش عارف إزاى بس كان بيعملها

أما انا فحسيت بحضن ربنا لى جدا من ست سنين تقريبا
كنت فى لحة ضياع مخيفة واحساس إنى فقدت كل شىء
بس الحمد لله حسيت بثبات مش عارف جالى إزاى حمدت ربنا وعديت المرحلة والحمد لله على خير

ربنا يجزيكى خير على التذكرة الأكثر من رائعة

R-H-S يقول...

والله ياتغريد انك بنت حلال بجد
وانسانه اقل ما يقال عنك انك مجتهده ومتفانيه فى اي حاجه بتعمليها
ربنا يقويكي دايما ويوفقك انتى تستاهلي كل الخير

سندباد يقول...

جزاك الله خيرا وجعله في ميزان حسناتك سعيد جدا بحالة الرضا عن نفسك اللي انتي فيها وسعيد بالنصيحة الجميلة دي اللي عاملة زي الصدقة الجارية
ربنا سبحانه وتعالي يرضينا بما يرضي
جزاكي الله عنا خيرا مرة تانية
تقديري وتحياتي لشخصك

كلمات من نور يقول...

هو الله الحنان المنان يا فتاتي أقرب إلينا من حبل الوريد

جزاك الله خير الجزاء على هذا البوست الطيب ..دمتي في معية الله

mrmr يقول...

الله يرى الخير والصلاح لنا دائما
ارمى حمولك عليك فهو يعولك
ربنا يدبر امورنا
امين

مدونة رحلة حياه يقول...

السلام عليكم
من اجمل ما قرأت بهذه الصياغة وبهذا الاسلوب الممتع وكانها كلمات تداعب انات قلوبنا
وفقك الله ويسر لك الامر ولنا جميعا
دومتى بخير

~ISLAM~ يقول...

بجد ربنا يحميكى ويوفقك دايما

حصلتلى حاجات كتيره م اللى قولتيها

عشان كده عارف الاحساس اللى عايزه تقوليه

بجد شىء ملوش وصف

ربنا عظيم اوى فعلا

لا اله الا الله سيدنا محمد رسول الله

تحياتى ليكى

أم يقول...

تحياتي لك وتقبلي مروري

sony2000 يقول...

ياااااه

حسيت بيها كتير:)
بس اكتر مره
ماكنتش بصلي

فحصلي فيها موقفين
مره كنت مشيه فالشارع
ولقيت قرأن وجه علي ايه للصلاه
تقريبا كانت (لصلاه علي المؤمنين كتبت موقوتا)

تاني مره كانت في كليب ديني
في اخرها


سورة الزمر آية رقم 53
{قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم}
وكانت عن الصلاه

يومها عيطت
والحمد لله اتظمت
ادعولي اكمل للاخر بس:)

salwa يقول...

السلام عليكم
الله يجازيكي كل الخير و يجعله في ميزان حسناتك
ادراج راااااائع و تسلم الايادي
اعذري تقصيري
سلاااااام

Sheroo يقول...

ربنا كريم وكريم أوى
ومفيش أحن منه علينا
ياريت لو دايماً الناس تفتكر كده
وتتيقن من أن ربنا عمره ما بيعمل حاججة وحشة
وكل حاجة هو مقدّرهالنا وكاتبهالنا
حلوة التدوينة

موجة يقول...

يااااااااااه
بجد حاجة جميلة اوووى لما تحسى انك مهمومة وتلاقى حد يدعيلك دعوة انتى محتاجاها من ربنا
حصلت لى كتير
واحلى دعوة بحب الناس تدعيهالى هى دعوة ربنا يريح قلبك
واحلى دعوة بحب ادعيها اللهم استرنا فى الدنيا والاخرة ولا تفضحنى بكشف سترك عليا يوم العرض عليك

واحلى حضن فى الدنيا هو حضن ربنا

بوست جميل مليئ بالوحانيات الهادئة

ربنا يوفقك

أم يقول...

ربنا يسعدكم يارب تحياتي الصادقة

كريمة سندي يقول...

التفاني مهم جدا تقبلي مروري

محمد التركى يقول...

السلام عليكم

الله الله ياتغريد ربنا يارب يشرح قلبك
انا والله وانا بقرأ كلماتك واللى كتباه قلبى كده انشرح

يااااااااه ربنا سمعنا وعالم بحالنا وبيكلمنا وبيحضنا وبينجينا
ياااااااارب

انا كتير قوى ببقى نايم زعلان من حاجات كتير حصلتلى وبتحصلى ويمكن بنام من كتر الهم والغم اللى ببقى فيه
واحلم انى بقرأ سوره معينه واكون انا فى الحقيقه مش حافظها لكن فى الحلم بقرأها بحفظ شديد بقوم من النوم وعندى كل امل فى الله ان المشكله خلاص اتحلت سبحانك يارب
اللهم اشرح لى قلبى وقلوب كل عبادك المخلصين

ربنا يارب يبارك فيكى يارب ويقويكى ياتغريد يارب

سامحينى بقى على طولت غيابى والله مدونتك وحشتنى جدا وقصصك كمان

تقبلى تحياى
اخوكى
محمد التركى

Unknown يقول...

السلام عليكم

أنا باسلم بس.. وباطمئن إن كل الأمور تحت السيطرة..

أخبار المذاكرة غيه؟ والمشروع الدراسي؟ والمشروع (التاني)؟

يا مسهل يا رب..

تحياتي أختي الكريمة.

R-H-S يقول...

تويييييييييييييييتر
اخبارك ايه ...علي ما اظن ولكني متأكد انك فى امتحانات دلوقتي
دعواتنا لكي بالتوفيق والنجاح الباهر
ربنا يوفقك

Dr. Kafy يقول...

معلش ربنا يعينك هما الأطفال كده

تيمور يقول...

ازيك همسات عاملة اية

اشكرك على سؤالك عليا

ربنا يسعدك

ويعينك ويوفقك

تحياتى