الدموع هي الانسان قالوا منذ قديم الزمان... ان الدموع هي الانسان...عند الأسى يعبر بها عن الاحزان... وعندما يبتسم له الزمان...يذرفها فرحة وامتنان...وفي كثير من الأحيان...
هي دليل الشقاء والحرمان...ولكنها قليلا ما تكون دموع حب وامان...ونادرا نادرا ما نبكي امتنانا او عرفان...ليس لأننا افتقدنا للتقدير والاحترام...ولكن لان من يمنح الحب اصبح يداس تحت الأقدام...فأصحبت الدموع هي الانسان...وهناك الحب ذل واستعباد وكرامة تهان...والغش والزيف والخداع هم سر الاطمئنان...كيف؟؟؟ لا ادري !! ولكن ما اقره قلبي ...ان الدموع هي الانسان...وان الانسان بلا دموع بقايا انسان....

الأربعاء، 8 سبتمبر 2010

تتجوز عرفى


ازااااااااى تتجوز عرفى

الحكايه ليست بالصعوبه المتخيله ......طالما خلاص نويت وتوكلت واخدت القرار انت طبعا والجو بتاعك يبقى تعمل اللى هقولك عليه بدون نقاش فتح مخك معايا ونفذ طوالى

اول الطريق ابحث عن 2 شهود ظراف لطاف دمهم خفيف من نوعيه فوتلى وافوتلك ....... والنهاردة عندك وبكرة عندى وانت عارف ياحبيبى قد ايه البعد قاسى

تماااااااااااام ؟

وطبعا هات ورقه وقلم ........واكتب

انك انت الشاب المحترم ابن الناس المحترمين اللى تعبوا لحد ماكبرت واعرضيت واتعلمت ودخلوك الجامعه عشان تحب وتتحب وتنوى تتجوز بدون علمهم

عادى يعنى هى ايه المشكله !!!!!!!! بتحصل فى احسن العائلات
نويت تتجوز الانسه البكر المصون العاقل الرشيد اللى نوت تفضح اهلها فضيجة بجلاجل يسمعها الرايح والجاى وبلاد تركب الافيال
نويت على الجواز منها تحت اسم الجواز العرفى
طبعا ياابنى لازم قصه حبكم تكتمل وتتوج بالارتباط ولازم طبعا تنتهى بفضيحة ....... على العموم خلينا فى المهم

خلاص ؟!

كتبت اسمك وكتبت اسمها
اكتب بقى واكون زوج لها امام الشيطان ونفسى انما امام الله والمجتمع والناس واهلها
لاااااااااااااا ده لا ممكن ابدا ايه الكلام الفاضى دا

لا ابوها لو عرف هيكتبك ورقه تانية خالص .....ممكن وصل امانه او شيك
المهم ياعنيا بعد ماتكتب كل دا هات الشهود وكل واحد يوقع على الورقه انه شاهد مش مهم شاهد على ايه المهم انه شاهد حتى لو مشفش حاجة

وبكده يابنى تكون خلصت الاجراءات الشكليه دور بقى على شقه فاضيه وعيشلك ساعتين اوعى تسمع كلام حد يقولك ان دى اهانه لحبيبه القلب لا طبعا هى اللى اختارت تلبس بقى

وطبعا انت هتكون راجل وهتكمل للاخر يعنى لو بقيت اب مش هتكون ندل وتخلع وتسرق الورقه

لااااااااااا طبعا انت راجل (استرجل واشرب بريل )
هتسيب دراستك وتنزل وتدور على شغل عشان تصرف على حبيبه القلب والضيف الجديد

وكدا نبقى خلصنا ولوووووووووووولووووووووووووولى

والف مبروك وبارك للسانيورة
وان شاء الله نتقابل فى الطب الشرعى عشان تحليل الDNA

************************
اعزائى المشاهدين بنختم حلقتنا النهارده ونشوفكم فى نشره اخبار تلاته ووتلت تربع
والبوست اللى جاى هيكون مع اول واحد نفذ الشروط واتجوز عرفى

بس نفسى اعرف ليه هنادى ياخدها الوبا لوحدها ليه مايخدش حماده كمان لو عرفت الاجابه الصحيحة اتصل على 090000009000 وهتربح معانا عروسه وورقه جواز عرفى والشهود كمان
او ابعتلنا على تهييس دوت كم

ممنووووووووووع اللمس او الاقتراب او التصوير الطبق متكهرب
*********************

كل سنة وانتم طيبين
رمضان عدى بسرعه بس بجد احلى رمضان عدى عليا
ربنا يتقبل مننا صالح اعمالنا ويجعلنا من المقبولين
يلا عشان محدش يعتبرنا منايفه
كل واحد ياخد واحده بسسسسسسسس
عييييييييييب احنا مش فى اتوبيس
واحده بس انا حاطه كمرات مراقبه

http://4.bp.blogspot.com/_eh4A7SXhnkg/Sb1W4mVSURI/AAAAAAAAAp8/zGeKRVlYvdw/s400/egypt17.jpg

ودى بقى هديه لاى حد يدخل هنا دى حاجة اثريه مبقاش منها الايامدى
عشان تعرفوا غلاوتكم عندى بس


((((((قلــــــوب بــــلا مرســــــي))))

بطل كسل وادخل اقرأ وقول رايك

هتعرف ايه اللى جرا لكريم
وهتعرف على اللى مخبياه فيروز 4 سنين
وهتشوف بشاعه ياسر مع منه




هناك 37 تعليقًا:

R-H-S يقول...

انتى كدا فتحتي عنينا علي حاجات مكنتش اعرفها

عامل زي الفرخه اللي قالت للديك انت مش هتتجوزني بقي قالها ماشي بس اتجوزك عرفي
هههههه
طبعا مش فاهمه النكته
ماعلينا

كل سنه وانت طيبه وربنا يتقبل رمضان مننا جميعا

يمين فى يمين يقول...

يسعدنى ان انا اكون صاحب اقول تعليق

وسعيد بالمرور بالمدونة

وعلى فكرة انا بحب اسمع القصص دى

يشرفنى زيارة مدونتى

همسات وبحــ الحياه ــر يقول...

حمد لله على السلاااااامه
انا قلت خطفوك وبقيت جندى مجند

بس فين قلوب بلامرسى :)

سندباد يقول...

جميل انك تتكلمي في موضوع مهم زي ده باسلوب ساخر من غير ما تفقدي السيطرة علي المعني الاساسي
ربنا يعفو عنا ويرحمنا ويبعد عننا وساوس الشيطان
تحياتي
مدونتك تزداد خبرة وتالق

mrmr يقول...

طبعا انا معفيه من الجواز العرفى
هههههه
وبعدين الرجاله بس اللى بيشربوا بريل
ستات كتير عادى البريل وبيره وسعات ويسكى هههههههه

اقولك ايه يا وزتى انا طماعه ومش عندى كحك ولا معزيات من دى ممكن اخد الطبق ده كلوووو وحدى
عينى ح تطلع عليه
واللى ح يمد ايده وياكل ح يزور اكيد بس ده بعد ما تشيلى الكهربا منه
لحسن انا صاحبه عيال

ههههههه
تصبحى على خير يا جميل

طوبه فضه وطوبه دهب يقول...

هههههههههه والله انتى مشكله كل سنه وانتى بالف خير ويارب كل رمضان احلى من اللى قبله

فراشة يقول...

لا خالص دا الجواز العرفي اسهل من عمل البيض المسلوق حتى D:

فكرتيني بحاجه انا مرة وانا ف الكلية فجأة كدا انتشر قوي الموضوع دا ف التليفزيون ف بقول لوالدتي الا يا ماما يعني عمرك ماقلتيلي ماتكلميش ولاد اكتر من الحدود المعقوله او تقوليلي حتى اضرار الجواز العرفي :))

قامت بكل طيبة وبراءه قايلالي لا ما احنا واثقين فيكي انك عمرك ما هتعملي حاجه غلط

المشكله ان أغلب الامهات برضه شايفين كدا والابهات كمان شايفين ان ولادهم مش بيعملوا حاجه غلط

وبتتكلمي جد هتجيبي لقاء مع حد اتجوز عرفي ؟؟

المهم ... ربنا يجعل كل رمضاناتك احلى من بعضها
بس مالهم المنايفه D: والله مش كلهم

وشكرا ع العيدية انا بحب اوي الربع جنية المخروم

عيد سعيد عليكي وع الأسره

VÖltaa يقول...

امال اما جربنا العرفى مكنش حلو كده ليه
:p

Unknown يقول...

ياااااااه دانتي قديمة أوي :) الجواز العرفي ده بطل من زمان و مبقاش في جواز أساسا لا عرفي ولا شرعي :)
تحياتي دموع و متشكرين ع الكحك :)

غير معرف يقول...

ههههههههه
ايه يا دموعى دا ؟؟؟
انتى بتحرضى الشباب على الجواز العرفى
هههههه
انتى مشكلة بجد
يخرب عقلك
البوست كله يضحك
وبخيلة كمان ... طبق الكحك متكهرب
هههههه يا بخيله مش عايزين منك كحك

كل سنة وانتى طيبه يا مشكلة المدونات
عيد سعيد عليكى وعلى اسرتك كلها
دمتى بخير يا قمر

محمود نشأت يقول...

نسيتى اهم حاجه
العزومه اللى بعد ما الشهود تمضى على طول
لازم يبقى فيه عزمه امال الناس تيجى تشهد ارديحي كده

كل سنه وانتي طيبه

شوية قهوة يقول...

ازيك يا قمر
وحشاني والله
جه معاد البوست الجديد خلاص
ربنا يستر والله على شباب اليومين دول
كل سنة وانتي طيبة

جوجو يقول...

السلام عليكم
ايه بس الكلام ده ؟؟؟؟؟؟؟
جواز عرفى هههه ربنا يستر علينا
عاملة ايه ؟ يارب تكونى بخير
تحياتى

باحث عن حب يقول...

اخبارك
كل سنه وانتى طيبه
ده مش حب ولا ليه علاقه بالامان
ده رغبه وبتروح لحالها
ومدام مفيش مبادىء
ولا دين يبقى خلاص
يارحمن يارحيم
كل سنه وانتى طيبه

Rosie يقول...

هاها..الهدية ربعين و مخرومين كمان..
نيجى بقى على موضوع البوست..
بجد انا مش مصدقة الناس دى مخها بيقى فين انا بتهيألى ده لة حد متبنج ميعملش كده برده..جميل الأسلوب الساخر من حد مفروووس..
كل سنة و أنت طيييييييييبة..

Unknown يقول...

بوستك تحفه بعشق اسلوبك الساخر وميرسي على الربعين المخرومين دول مبروك اللوك الجديد حلو اوى زوقك تحفه كل سنة وانتى طيبة ياقمر

جايدا العزيزي يقول...

انا بقى ما عرفتش اجابه السؤال


يعنى متزوجه شرعى ولدى ثلاث ابناء

خارج المسابقه


بس الكحك والبتفور والبسكوت واااااااااو فتحتى نفسى


وانا بحب الحاجات دى


عيد سعيد يا قلبى


تحياتى

~ISLAM~ يقول...

الله دى حاجه حلوه خالص
خلاص هخلص المصلحه دى واجيلك
هههههههههههه
شكرا يا دموع

Story pain يقول...

من أجمل البوستات اللي كتبتيها يا قمر

بموت في أسلوبك الساخر ده

الموضوع مهم ...يارب يفيد الشباب والبنات ويجعله في ميزان حسناتك

وانا برده نفسى اعرف ..ليه هنادى يخدها الوبا ومايخدش حماده كمان...

جميل أوي تصميم المدونة الجديد

تسلم ايدك

عيد سعيد عليكِ

إيمان هلال يقول...

حلو اوى اسلوبك الكوميديا السودء

safa7_karmooz يقول...

كل سنة وانتى طيبة

salwa يقول...

السلام عليكم دموع القمر
اسفة للتاخير و الف شكر لسؤالك
عيد فطر سعيد و كل عام و نحن لله اقرب
ادراج راااااااااائع يا ليت يتعظوا
تسلم يدك و جزاكي الله كل خير
سلاااااااااااام

الــحــــنـــــــــــــــــــين يقول...

ايه الروعه والجمال ده كلام كبير كبير يعنى سعيد جدا بالموضوع ده ربنا يكرمك

موجة يقول...

اللهم انى يارب صايمة عن كل حاجة تغضبك
يالهوى
جواز عرفى
ده فضيحة رسمى
على يد شيطان جنى
ربنا يهدى بنات المسلمين ويهدينا جميعا
امين
كل سنة وانتى طيبة
وانا بقى عاوزة كحك كتير عشان امى مش موجوده
ماليش دعوة بلاش بخل

غير معرف يقول...

هههههههههههههههههههه
رائع يا معلم انتى جبار

bianka

Tamer Moghazy يقول...

حللللللو قوي كده..
انا كنت حاسس من زمان اني جوايا ميول (عرفية) بس كنت محتاج اللي (يوجهني) (';' )
وانت والحمد لله....عملتِ الواجب وزيادة :)

كل سنة وايامك كلها اعياد :)

Sahar Elgafary يقول...

بسم الله والصلاة علي رسول الله
يعني كويس الغضه دي أدخل علي دموع القمر ألاقي عنوان تاني خالص ..ماشي

سماح المره دي عشان العيد بس ..أستني بقه خدي العيديه..

Sahar Elgafary يقول...

بسم الله والصلاة علي رسول الله
في كل عام تتفتح فيه
الزهور وتحلق فيه الطيور
أهدي اليكم أزهاري
أعطر لكم أنهاري
لأسكبها بين كفيكم
وليموت العالم عطشا عشقا في
عشقا في أعينكم

mrmr يقول...

مبروووووووووووووووك النيو لوك يا قمر
وكل سنه وانت طيب

انت جبااااااااااااره يا بت
بس ذى العسل

خواطر شابة يقول...

كل سنة وانت طيبة وينعاد عليك بكل الخير ان شاء الله

سندباد يقول...

كل سنة وانتي طيبة عيد فطر سعيد
تحياتي

طوبه فضه وطوبه دهب يقول...

كل سنه وانتى بالف خير يا حبيبه قلبى ويارب ديما بخير وحب وسعاده

gogo!sf يقول...

كل سنه وانتى طيبه يا قمر
وعيد سعيد عليكى وعلينا جميعاً

الازهرى يقول...

لالالالالالالالالا
الموضوع بقى ابسط من كده بكتيييييييييير

تقبلى يا حبيبتى ؟
وماله ما يضرش

سلام بقى يا حبيبتى انازهقت
باى يا حبيبى وربنا يوفق كل واحد فينا ف حياته


كل سنة وانت وكل الأحباب فى خير وسلام

موجة يقول...

مبروك يا قمر على الاسم الجديد
همسات وبحر الحياة
والنيو لوك الجديد
كله على كله لما تشوفة اوووله
مبروك

جوجو يقول...

السلام عليكم
كل سنةوانتى طيبة
عيد سعيد عليكى
تحياتى

اسراء نايف يقول...

ههههههههههههههههههههههههههههه
تحفه ياقمر بجد
تسلمي
الديزاين حلو اوووي