الدموع هي الانسان قالوا منذ قديم الزمان... ان الدموع هي الانسان...عند الأسى يعبر بها عن الاحزان... وعندما يبتسم له الزمان...يذرفها فرحة وامتنان...وفي كثير من الأحيان...
هي دليل الشقاء والحرمان...ولكنها قليلا ما تكون دموع حب وامان...ونادرا نادرا ما نبكي امتنانا او عرفان...ليس لأننا افتقدنا للتقدير والاحترام...ولكن لان من يمنح الحب اصبح يداس تحت الأقدام...فأصحبت الدموع هي الانسان...وهناك الحب ذل واستعباد وكرامة تهان...والغش والزيف والخداع هم سر الاطمئنان...كيف؟؟؟ لا ادري !! ولكن ما اقره قلبي ...ان الدموع هي الانسان...وان الانسان بلا دموع بقايا انسان....

الجمعة، 15 أكتوبر 2010

تعليق غريب وانجازات والحقيقه المرة


((صباح الخير ياحاجة دا انت قديمة قوى انت لسه فاكره تحطى البوست))
دى رساله من غير معروف كلف نفسه وبعتهالى على البوست اللى فات وكلام تانى غريب !!
انا مش عايزة اعرف مين بس كنت اتمنى ان يكون اجرأ من كدا ويدخل بأسم مدونته

بص ياخويا او يااختى اى كان فانا تعمدت انى احط البوست فى الميعاد دا وبعد فوات الاوان
زى ماحضرتك قولت
عشان افكر الناس اللى زى حضرتك ان الموضوع لسه مخلصش
هى مش هوجة وبتعدى لا .......نفسى نرتقى بفكرنا شوية وناخد من كل محنه بنتعرضلها منحه

انا تعمدت انى اقفل التعليقات عشان مش عايزة اشوف تعليق يقول حسبى الله ونعم الوكيل جزاكى الله كل خير كلامك صح وكدا لاااااااا انا عايزة اعرف ايه الخطوة العمليه اللى فعلا عملتها فى حياتك انا مبتكلمش على البوست دا انا بتكلم بصفه

يعنى لما بتحصل مشكله الاقى الناس ثارت وهتفت وعملت مظاهرات اى كان المجال وبعد شوية الدنيا بقت هس
وننشغل بحاجه تانية
ولما نسأل ايه اخبارك فى الموضوع تبص وتمص شفايفك وتسكت

انا اللى قصدته لما حطيت البوست متأخر كدا انى مش عايزة المواضيع تعدى علينا وخلاص لا انا عايزة نبدأ نتغير
انا كان ممكن احط الموضوع فى وقت المشكله والناس هايجة طيب وبعد كدا احنا فيييين عملنا ايه

حضرتك بقى فهمت ولا فهمتى انا قصدت ايه ولا اقول كمان برضو التكرار بيفهم الشطار

مسأله بقى انى منافقه فانا مش هرد عليها لان دى مسأله تخصنى انا وربنا هيحاسبنى انا
ياريت كل واحد يهتم بنفسه ويصلح نفسه ويظيط ايمانياته الاول وبعد كدا يبص للى حواليه



بالنسبة ان مدونتى مش عاجباك فانا مبضربش حد على ايده انه يقرا كلمة من بوستاتى

*************************************************************



انا بقى جاية ارغى والوكلوك شوية

الفترة اللى فاتت من حياتى بجد انا سعيده منها جداااااا اولا انى غيرت فكرى ونظرتى للامور شوية و بقيت حرة وبدون قيود والحريه اللى اقصدها حريه فكريه والقيود دى هى العادات اللى دايما بتقيد الانسان وتخليه يخسر احلامه وميحققش اهدافه وبدون مانتجاوز مبادئنا قيود جوايا بتخلينى ومأخدش خطوة لقدام حد يقولى وايه اللى عملتيه الفترة اللى فاتت اقولكم الفترة اللى فاتت كنت مصابه بحاله من الملل اللامتناهى وبفضل الله تجاوزت المرحله دى وعرفت ان اللى مخلينى مكتئبه ان مفيش جديد فى حياتى وبدأت افكر ايه اللى اعمله جديد وبالفعل نفذت كلها حاجت بتقربنى من هدفى




*********************************************
اول حاجة انى اديت كورس افتح قلبك والكورس دا مش قادرة اقولكم كمية السعاده اللى حسيت بيها
الكورس كان 5 سيشنات ساعه ونص يوميا
مكنتش مصدقه اولا العدد اللى حضر كان 30
ومتوقعتش انهم بيعتوا تقييمهم بعد الكورس وانهم عايزينى ادى كورس تانى

بحمد ربنا انه ادانى الجرأه انى ادى الكورس لانى اصلا وكلام فى سركم بغرق فى شبر مية
بس هذا من فضل ربى انه من عليا وخلانى ادى بالجرأه والثقه اللى كنت فيهم

طبعا بشكر كل من شجعنى وحضر يشهد ربنا انى بعزهم جدا وتوجيهاتهم وتقييمهم شهاده اعتز بيها

اول حاجة بجد بشكر امى لانها السبب الاول فى تشجيعى

وصديقتى امنية (كبر دماغك ) وطبعا البشمهندش جهاد (منبهات ) والدماغ الرايقه زناتى وحبيبتى شوكولاته ودولى ومنى وروكة منمونه ( بيطرية ) واخويا الكبير اللى كان نفسى يحضر بس كان متابعنى بتوجيهاته محمد البنا (طريق النجاح )

بشكرهم جدااا ان شااااااااء الله قريبا هدى كورس انجح بطريقتك ودعواتكم كدا

**********************************

هنزل تانى لاطفالى فى المسجد وحشونى كتيييييير
وربنا يثبتنى وافضل مع الاستاذه اللى بتراجعلنا على القران
بقرأ دلوقتى فى كتاب هيا بنا نؤمن ساعه لمجدى الهلالى تحفه بجدددددد

************************************

التحقت بأكاديمية اعداد وتطوري الذات مع الدكتورة هدى طاهر بجد مش قادرة اقولكم كمية السعاده اللى انا فيها لانها بجد اكاديمية تجنن وكماااان بقيت عضو فى فريق كنوز النفس وكماااان بقيت عضو فى جمعيه رساله فى مجال الصم والبكم وبدأت اتعلم اشارات الحروف حفظت اسمى :):) النهاردة كان يوم جميل اتجمعنا فيه احنا والاطفال الايتام ولعبنا ورسمنا وغنينا وحكينا قصص وقريب هيعملوا حفله وهيخلونى ادربهم على الانشاد واعملهم عرض على اغينة للنجاح :)

*************************************
كملت كتابه القصه قلوب بلامرسى لانى كنت وقفت تماما عن الكتابه لان حسيت ان الافكار طارت والدنيا ملخبطه بس الحمد لله جمعت افكارى ودعواتكم وانا سعيده برضو بمتابعتكم ليها بعمل فى كتاب اسمه يلا نعيشها صح ودا هيكون شامل كل الكورسات اللى عملتها دعواتكم من زماااااان واانا نفسى اتعلم جيتار صحبتى وعدتنى ان كلها شهرين وهتعلمنى انا وامينة (كبر دماغك)

***********************************
واخيراااااا من اسبوع كدا الاستاذ نيبل حصفى فى جريده الاسبوع رئيس تحرير اخبار الشرقيه عمل جريده جديدة شهريه وطلب انى اكون معاه
وكمان جريدة حزب الوفد جريدة اسبوعيه الاستاذ محمد شحته اتصل عليا وعايزنى انضم معاه
شوفتوا من كام يوم كنت بدور على حاجة تملى يومى دلوقتى مش عارفه الااحق من المسؤوليات جامعه جرنال مسجد كورسات قصه الاكاديمية دعوااااااااتكم

******************************************
بلاش كسل واضغط هنا

((((((قلــــــوب بــــلا مرســــــي))))

هتعرف الحقيقه المرة اللى
عرفتها سلمى عن ابوها
ومنه مع ياسر
اكيد هستنى تعليقاتكم لانها اكيد تهمنى


هناك 30 تعليقًا:

همسات وبحــ الحياه ــر يقول...

اذا اردت تغيير العالم ابدأ بنفسك اولا

يعنى مش تقول يعنى انا اللى هغير الكون
ايوه انت ابدأ وغير نفسك
زى بالظبط لما تلاقى مساحه ارض كبيره متوسخه وكلنا موجودين وكل واحد بدأ ياخد الدايرة اللى حوابيه وينظفها اعتقد ان المساحه كلها تنضف


قبل ان تلفت نظ جارك الى القمامة المتراكمه فوق سطح منزله نظف القمامة المتراكمة امام منزلك انت اولا

يعنى بدل ماتفضل تطلع عيوب اللى حواليك شوف عيوبك واخطائك انت الاول وظبطها

واتمنى ان كل واحد يفكر فى الكلام قبل مايقوله عشان منجرحش حد بكلامنا
سواء وجها لوجه او على الميل او المدونة

سندباد يقول...

اولا احييكي علي جراتك في الحديث واسلوبك المقنع ودي اكيد نتاج الاسبوع الطويل اللي كان مليان حاجات كتيرة
اتمنالك السعادة دايما انشالله
ثانيا سيري في طريقك ودعي الاخرين يتحسرون من نجاحك
ثالثا استمري في اللي انتي فيه ده لانه نعمة بجد ومتخليش حد يكسر مجدافيك
نورتي التدوين تاني

كبر دماغك يقول...

حببتى هموسى بجد رااااااائع جدا الرغى ده اوى خااااااالص بس المره الجايه بعيد عندك يعنى تقولى خير الكلام صداع انتى
ههههههههههههههههههه
لا طبعا هموسى بجد رنبا يااااااارب يوفقك على الى انتى عملتيه فى حياتك وياااااااارب بجد تحققى كل الى انتى عيرزاه ويحبك ربنا اوى ويمن عليكى بحبه وكرمه
وخدى بالك من رضا ربنا كويس اوى
وكمان وفقى اولوياتك يا هموستى
ومتنسيش ارمى كيس البطاطس هههههههههههه ماشى

همسات وبحــ الحياه ــر يقول...

سندباد
*******

سعيده بوجودك

انا ماشية بمبدأ
سأكتب مايقوله الناس ضدى فى اوراق وسأضعها تحت قدماى وكلما ذادت الاوراق كلما ارتفعت لاعلى
اهم حاجة متأثرش بكلام حد
اشوف وجه نظر اللى قدامى واخد اللى يفيدنى واللى يكسر مجاديفى يبقى ارميه وراضهرى

تحياتى لك

همسات وبحــ الحياه ــر يقول...

منمونتى واحبيبتاه ههههه

مدونتى بقى وارغى فيها براحتى عندك اعتراض :)

ربنا يحقق كل اللى بتتمنيه يامنية بجد انا شايله جميلك فوق فوق راسى لانك بجد من الشخصيات اللى واحد بيعتز انه عرفها
حاضر هاخد بالى من رضا ربنا

وهرمى كيس البطاطس

بس انت عارفانى صدقينى اصلا مفيش لاكيس ولا بطاطس
لانك عارفه قلب حبيبتك :):)

وبعدين ايه الافترى دا انت عرفه البطاطس بكااام :)

mrmr يقول...

دموع القمر

احييك على رفضك لحياه الملل والاكتئاب
ورفض الاستسلام ونهوضك مره اخرى لحياه كلها امل وسعاده
يكفى انك راضيه عن نفسك وقبل رضا النفس رضا الرب

ربنا يسعد اوقاتك
وحمد الله بسلامتك

همسات وبحــ الحياه ــر يقول...

مرمر
قطتى

منورانى
الحمد لله
بعتبر ان الملل دى مرحله ومحطه لازم نمر بيها بس اهم حاجة هنقف كتير ولا هنكمل
ربنا يجازيكى كل خيير

ليس فقيرا من يحب يقول...

ماشاء الله عليكى بجد

انا مش عارفه اقولك ايه

انتى شخصيه روعه بكل المقاييس مثقفه وواعيه وفاهمه وجدعه جدااا كمان ودؤوبه ونشيطه

ربنا يبارك فيكى ويحفظك
انا فخورة بيكى اوى
والناس اللى متهمناش متلزمناش اصلا

باحبك اووووى

ربنا يوفقك

Hanan Elshafey يقول...

انا هنا اهو
بس يعني قلت اسلم وامسي عشان متقوليش بطنش
انا مش بعلق علي فكره بس متابعه :)

ツSmiLeY AnGeLツ يقول...

السلام عليكم
اولا :
حبيت شخصيتك وردك على الي عمل هذا التعليق ردي جميل فيه نوع من تانيب الضمير ليه او ليها
ثانيا:
ربنا يسعدك ويفرحك ويخلي كل ايامك سعاده
ومتشوفيش يوم ممل او كتئاب
ويارب تفضلي طول عمرك سعيده
تقبلي مروري
سلامي لاحلى بنوتة.

VÖltaa يقول...

ماشاء الله
:)

ايه الناس الناجحة

ابعدى عنى لاتعدينى ولا حاجة

اخصصص دى اخرة تربيتى ليكى :p

ههههههههههه

ساسو يقول...

حبيبتي دمووووووووع
وحشتيني مووووت
لأ نطولها شويه علشان تبقي أد اللي فوقيها.
وحشتيني مووووووووت أيوه كده يا بت يا ساسو ههههه

~ISLAM~ يقول...

اولا ازيك يا دموع ومبروك الحلقه الجديده فى قلوب بلا مرسى

ثانيا جميل ان يكون ليكى موقف وانك تبدأى بنفسك والاجمل انك فى الاول والاخر صاحبة المدونه وانتى حره فى اللى تعمليه اينعم لينا حق عليكى كزوارك ومتابعينك
لكن معتقدش ان لينا حق التهكم والنقد الماسخ اللى ملوش داعى

ثالثا الكورس والمسجد والاكاديميه ويلا نعيشها صح وقلوب بلا مرسى والجرايد كل دى حاجات جميله استفيدى من كل حاجه فيها واخلصى فى عملك فيهم وانتى هتلاقى نتايج اجمل ما تكون

رابعا بدون اى مجامله حاسس انى شايف مستقبلك المبهر الجميل ادام عينى وانا بقرأ البوست يارب يكون النجاح دايما حليفك

تحياتى ليكى ومعلش رغيت كتير بقى
صحيح ابقى ردى على الكومنتات فى قلوب بلا مرسى

يلا سلامو عليكم

جنون عـبقري يقول...

أحيانا أختي في الله بعض التعليقات تكون كما تفضلتي .. لأن الموضوع لا يهم قارئه ويأتي من باب المجاملة فقط .. لأنك إما رددت عليه أو ليعرفك على تدوينته ..

وأنصحك حتى تتفادي مثل هذه التعليقات .. التي تؤدي لإثبات الوجود فقط .. أن تطرحي في آخر التدوينة مثلا دعوة للنقاش .. أو إنت وجهة نظرك إيه وهكذا حتى يعبر من يريد عما في داخله بصراحة وبدون أي مجاملات.

جايدا العزيزي يقول...

اخس عليا دايما كده اجى متاخرة

وحشانى

اسفه شفت الرسالهعلى الفيس متاخر

حلو اووووووووى الرغى

ربنا يسعد ايامك دايما يارب

انا اخدت اللنك علشان اكون اول الموجودين

تحياتى

باحث عن حب يقول...

السلام عليكم
الله
الله
اله
فرحت بكلامك
جدا
وقرأت البوست من اول مانزل
بس مكنش فى نصيب
انى ارد
بس احب
اقولك
واستعينوا على
قضاء حوائجكم بالكتمان
يارب يارب يارب
يبارك فيكى يارب
بالنسبه
للتعليق الغير معرف

ده انسان بيخاف انه يقول الحقيقه باسمه
عدم الرد
عليه
افضل
حفظكى الله

باحث عن حب يقول...

استأذنك
لى عوده علشان
عندى رد تانى
بس انا مستعجل
والله

همسات وبحــ الحياه ــر يقول...

رااااانيا

(وش مكثوف ) هههه
ربنا يخليكى ياحبيبتى
انا اللى سعيده انى اتعرفت على شخصيه زيك

همسات وبحــ الحياه ــر يقول...

حنان الشافعى

ربنا يخليكى ياقمر :)
انا اللى قصدته انك قولتيلى لما يكون فيه حلقه جديدة قوليلى عشان اتابع بس كدا هههه

نورتينى ياحنون

همسات وبحــ الحياه ــر يقول...

خواطر مع الحياه

المفروض مكنتش ردييت عليه بس انا قولت ادام هو فكر كدا يبقى اكيد فيه ناس تانية برضو دماغها بتقول كدا
وكان لازم اوضح الفكره

تحيااااااتى ياقطتى

همسات وبحــ الحياه ــر يقول...

فولتا

ههههههههه
انت تطول اكون جنبك يابنى هههه
لا بجد انت شخصيه جميله ودماغ
بس موجها للعلم شوية عشان تتخرج وتشتغل وتتجوز ولا ناوى تغرس صباره هههه

همسات وبحــ الحياه ــر يقول...

ساسو
نورتى ياقمر
وانت كمان واحشانى

غير معرف يقول...

ربنا يسعدك ويكرمك كل الخير يارب
معليش مقصرة معاكى يا توتى يومين ويعدوا ان شاء الله
ضفت مدونتك دموع القمر فى منوع
اما قلوب بلا مرسى فى الادبيه

richardCatheart يقول...

صباح الجمال

اولا انا وحشنى اووووووووووى المجى هنا بقالى فتره مقصره بس انا عارفه كويس اوى بتعامل مع مين واد ايه انت من الناس اللى بتقدر بجد

ثانيا مش هارد على كلامك للغير معرف دى حاجه بتعتك وانت قولتيله اللى فى ضميرك ربنا يصلح الحال


ثالثا ودى اهم نقطه فى الموضوع لان عشقى ل ال بيت لبمصطفى غير عادى صلى الله عليه وال بيته وصحبه اجمعين واٍال الله صحبتهم يوم العرض عليه ولا ونى اشك انى استاهل دا بس ربنا كريم وأسأله

السؤال بتاعك فى البوست اللى فات دا هل واجبنا او المفروض اننا نقف دفاعا عن امنا عائشه والصحابه ولا لاء ولا ايه

بصى انا قريت فتره عن الشيعه ووجه نظرهم فى الصحابه وامنا عائشه لدرجه انى كنت قربت ادخل فى مرض نفسى من كتر احساسى بالعجز مع الوقت وتعمد منى نسيت الموضوع دا وقررت ماقرائش عنه لانه بيبوظ اعصابى ويوترنى فعلا
لغايه ماكنت بتكلم مع صديق بعزه وبحترمه واتفتح الموضوع وجاتلى نفس الحاله دى تانى بس الوضع اختلف
وانا بكلم ربنا وبقوله يارب انا بحبها وبحب حبيبك اوى وبحب عمرو وابو بكر
انا عجزه وتعبانه
الحاجه الوحيده اللى نطت فى دماغى سوره النور وتبرئه امنا عائشه بكلام الله عز وجل نفسه
فاساعتها اقتنعت ان الناس دى والصحبه دى اعلى مننا بكتير واعظم
ورد اعتبرهم مابيجيش غير عن طرق الاهيه
طبعا علينا لو سمعنا كلامه بغيضه نردها
بس الا كيد انها مش هتأثر فى دول دى ناسي المخ اتلغى وسيطيرت عليه احقاد من قرون وسنين متوارثه

اللهم اسألك الرضا وحسن الصحبه يوم العرض عليك صحبه المصطفى عليه افضل الصلاه والسلام وال بيته وصحبه اجمعين ليوم الدين


نيجى لبقيت البوست اعذورينى بعوض ههههههههههه

سعيده بيكى اوى مبروك على الكورس الجميل يا دكتور ههههههههه القلوب

وسعيده اوى يا قمر انك هاتنزلى للولاد تانى المسجد ربنا يعينك اصعب حاجه معامله الاطفال وخصوصا لو مش ولادك

ومبرك الانضمام ان شاء الله عن قريب للجرائد المعارضه ارفعى رسنا مصر محتاجاكى يا قمر قصدى يا رافت ههههههههه

يارب اسمع عنك كل خير على طول
ويارب تفضلى فراشه محلقه فى كل المجالات وماتحسيش بالملل دا ابدا

وحاسه ان البوست اللى جاى
هاتيجى تقولى نفسى فى اجازه يارب اجازه
ههههههههههههههههههه

سمحينى على عدم قدرتى على متابعه الحلقات والله الوقت ربنا اعلم
وفى نفس الوقت ماعنديش القدره على متابعه حلقات مسلسله غصب عنى والله
بس انا هنامعاكى ان شاء الله على طول

يا خراببببببببى كل دا تعليق
صباحك فل

MaNoO يقول...

اولا بحييكى على طريقتك فى الرد على الموقف اللى حصل ودا واضح فيه شخصيتك الجديده اللى انتى حباها ومبسوطه بسببها مش عارف اقولك ايه ولا ايه على كل اللى بتعمليه ولكن حريه الفكر انا بعتبرها اهم حاجه فى الدنيا ان الواحد يعيش يجرب ويتعلم ويبقى ليه فى كل مجال استمرى ومتبصيش وراكى الا عشان تتعلمى من غلط عملتيه غير كدا استمرى تبصى لقدام وبالتوفيق ان شاء الله

شمس النهار يقول...

البوست عجبني
كله حياة

كله امل

ربنا يسعدك

ويوفقك
وبالنسبه لغير معرف

خدي من ده كتيييييير اووووووي

:)

Tamer Moghazy يقول...

على فكرة..كنت عندك هنا من شوية صغنننين وبعدين حساب النوتة تقل.. والمعلم مانع اي حاجة تخرج بدون حساب :)

Lady E يقول...

عجبني الrefresh اللي عملتيه لحياتك ده يا همسات

ربنا يكرمك ويوفقك ويخليكي متفائلة وفرحانه وفي حالة سلام نفسي على طول

وحشتيني

just dream يقول...

اول زياره ليا وان شاء الله مش هتكون الاخيره مدونتك جميله
وبجد بحييك على مجهودك وانجازاتك دى لان كلنا بنمر بنفس الملل ده ةالفراغ اليومى وانا كمان نفسى يكون يومى مشغول كده وبحاول اعمل كده فعلا
بحييك مره تانيه ع البوست وع مدونتك

الازهرى يقول...

أهو دا اللى كان مخلينى بعيد عن هنا
عارف هاجى ألاقى صدااااااااع ورغىىىىىىىى

بجد بقى وبعد تقديم كل فروض الإعتذار
الأيام اللى فاتت كنت مشغول جدا وكمان الحمد لله ربنا يسر والجامعة قبلت الورق وبدأت الدراسة امبارح والله المستعان

أما بالنسبة للموقفك من الأخ غير معرف فطبعا متفق معاكى ودا أحسن من ناس تانية راحت تعيط واختفت وفييييين على ما رجعت

أما بالنسبةلكل الأنشطة فربنا يعينك لكن بيقى شىء جميل لما تلاقى لفرحة والبسمة جواكى وانت بتعملى شىءجميل ينفعك وينفع الناس حواليكي

أما بالنسبة لقلوب بلا مرسى فأنا جمعتها وطبعتها وبإذن الله أقرأها فى هدوء وأرجع أبلغك رأيي فيها
اتفقنا ؟
يوووووه بلاش التكشيرة دى بقى والله راجع يا سى فى بقى أصدق من والله ؟