حاجات فى نفسى

نفسى اركب مركبه فى النيل ساعه الغروب وافضل فيها لغايه باليل بس طبعا يعنى مش هكون لوحدى

نفسى حد يجيبلى ورد اه والله بوكيه ورد احمر
وانا فى الجامعه لقيت واحده ماسكه بوكيه ورد يجنن رحت قولتلها جايباه منين على اساس افرح نفسى واشتريه قالتلى لا دا من حد عزيز عليا ومعرفش منين اتفرست طب وانا مفيش حد عزيز او حتى عزيزة يجيبلى ورد احمر كدا


نفسى ارجع صغيره ياااااه على الاقل كنت احس بطعم العيد طول الاربع ايام

يوم الوقفه كنت اجهز الفستان والشنطة والشراب والجزمة والتوكه والبورنيطه (كنت عايقه امال ايه ) وارصهم على السرير واستنى وافضل صاحيه واستنى الفجر يأذن واصحى البيت كله (كنت المنبه بتاعهم ) وافضل اتنطط واكبر مع الراجل والبس وننزل نصلى بيكون يوم جمييييل واحساس حلو وانا خارجة بقى لازم اركب المراجيح واتصور واجيب بالوتان (بحبها اوى )
واروح بيت العيله ونفضل هناك نلعب فى الجنينه ونضحك وناخد العديه (امال احنا رايحه بيت العيله ليه عشان اشوف خالو وخالتو يعنى) هههه
دلوقتى وبالنسبه ليا العيد هو ساعه الصلاه وبس
عارفين جبت كابات انا واصحابى مكتوب عليها احب ابى وامى _ القدس فى القلب _ الله يرانى فى كل مكان _حياتى كلها لله
ووزعناها على الاطفال فى الطريق وفى الساحه وكنت مبسوطة اوى اطفالى فى المسجد جهزتلهم العديه وكمان جوايز حلوة عشان اشجعهم


نفسى اروح جنيه خضره وافضل اجرى واتنطط زى ماكنت بعمل زمان واعمل كمان مرجحيه وافضل اتمرجح (دى مرجيحه كان عمو صاحب الجنينه بيعملها يربط حبل بين شجرتين وانا اتمرجح كانت تحفه )

نفسى كمان لو حد زعلان منى يقولى ميكتمش فى نفسوا انا عمرى مابزعل حد ولا بكون قاصده بحب الناس لكن ساعات الاقى حد متجنبنى بروح واسأله الاقيه زعلان من حاجة حصلت من فترة حتى انا نسيت تفاصيلها طب ليه لما يكون حد جواه حاجة من حد مش بيقول فى ساعتها حتى الشيطان ميدخلش بينهم

نفسى كمان اركب عجله اه والله عجله وافضل اجرى اجرى
لما كنت فى اسكندريه المرة اللى فاتت وكنا فى الجنينة اللى قدام البيت لقيت طفل راكب عجله نديت عليه واخدتها منه وفضلت الف بيها فى الجنينه كان احساس تحفه والله

نفسى ارجع اعيش فى قطر او السعوديه زى الاول بس عارفين نفسى افضل فى السعوديه اوى وكمان نفسى لما اتجوز اعيش هناك فى المدينه واكون جنب جدو وتيتا

نفسى اخد بابا فى حضنى دلوقتى واقولوا بحبك اووووووى وكان نفسى تحضر معانا العيد بس هستناك فى العيد الكبير بقى

نفسى الابله اللى بتحفظنا القران ترجع تانى عشان هى حلفت انها مش هتدينا تانى اصل احنا معندناش دم
انا استأذنت وسافرت وهى سمحتلى اه مش انا الاجازة دى اخدتها خمسه صياعه من الاسكندريه للقاهرة للبلد للاسماعيليه للقاهرة وفى النهاية رجعت 6 رمضان الى بلدى الحبيب هههههههه
هى بقى كانت مسافره البلد بتاعتهم وقالت انا بنزل مخصوص عشانكم يعنى لو مش هتيجوا قولولى هى نزلت مرة مخصوص عشان تلاقى واحده ومرة كمان عشان متلاقيش حد ومرة تلاقى 4
طبعا انا رجعت من السفر وبتصل عليها اخدت الطريحة واتبستفت لوحدى هههههههه
يارب ترجع تانى لحسن الواحد كدا هيتسوح خالص والله

نفسى كمان انجح السنة دى بتقدير وكمان مشروع التخرج ربنا يوفقنى فيه

نفسى فى حاجات كتير اوى
يارب بقى تتحقق

كل سنة وانتم طيبييييييييييين يااحلى مدونين انا عرفتها

**************



((((((قلــــــوب بــــلا مرســــــي))))

بطل كسل وادخل اقرأ وقول رايك

هتعرف ايه اللى جرا لكريم
وهتعرف على اللى مخبياه فيروز 4 سنين
وهتشوف بشاعه ياسر مع منه