الدموع هي الانسان قالوا منذ قديم الزمان... ان الدموع هي الانسان...عند الأسى يعبر بها عن الاحزان... وعندما يبتسم له الزمان...يذرفها فرحة وامتنان...وفي كثير من الأحيان...
هي دليل الشقاء والحرمان...ولكنها قليلا ما تكون دموع حب وامان...ونادرا نادرا ما نبكي امتنانا او عرفان...ليس لأننا افتقدنا للتقدير والاحترام...ولكن لان من يمنح الحب اصبح يداس تحت الأقدام...فأصحبت الدموع هي الانسان...وهناك الحب ذل واستعباد وكرامة تهان...والغش والزيف والخداع هم سر الاطمئنان...كيف؟؟؟ لا ادري !! ولكن ما اقره قلبي ...ان الدموع هي الانسان...وان الانسان بلا دموع بقايا انسان....

الاثنين، 6 ديسمبر، 2010

اعترافات بنوتة



التدبيسة دى جاتلى من اسماء عبد العزيز صاحبه مدونة امنحينى عذرا طبعا انا مقدرش ارفضلها طلب لانها اعز صديقاتى ربنا يخليها ليا
الصراحة انا من عارفه اكتب ايه بس كتبت كل اللى جه على بالى انا رغاية بقى واستحمولوا ههههههههه

بالنسبة لدراستى:

انا فى رابعه اداب اعلام قسم صحافه انا كنت علمى رياضه وكان هدفى انى ادخل هندسة لكن ربنا مأردش دخلت كلية الاداب وكان املى انى ادخل قسم علم نفس لانى بحبه جدا كان طموحى انى احضر الماجستير بس اكتشفت انه مينفعش فدخلت اعلام حسيت انها حاجة كبيره الدراسه جمييلة وسلسه مع الدكاترة السلسين ...لكن عندنا دكاترة اعوذ بالله والحمد لله ربنا وفقنى ووصلت لسنه رابعه وعقبال كدا مااخلص خالص القسم صعب جدا فى مذاكرة مواده لانه كلها كلام اكاديمى ونظرى بحت

بالنسبة لتدريبى او شغلى

انا بقالى 3 سنين فى مجال الصحافه اشتغلت فى اخبار الشرقيه واخبار الشرقيه اليومية وبانوراما اخبار الشرقيه واخييييرا اشتغلت فى صوت الوفد وانا فيه حاليا لكن لسه انا فى مرحله لدراسه سياسيه الجرنال جالى شغل فى القاهرة لكن اهلى مرضيوش

بالنسبة لطموحاتى

ان شاء الله هحضر دبلومة فى الصحه النفسية _ واكمل فى مشوارى عشان اكون مدربه تنمية بشرية _ واتمنى انى انشر كل كتاباتى _ بسعى دائما للتعلم كى اكون زوجة تقيه وام مثاليه _اتعلم اشارات الصم والبكم وان فعلا فريق انوار رساله ههيا يقوم على ارض صلبه لاننا بيه هنسعى لتغيير فكر مجتمعنا توسيع مداركهم واكسابهم مهارات جديده _ وان فريق تيم كنوز واللى اانا عضوة فيه يكون من اكفأ الفرق فى الشرقيه

نفسى اعمل حلقه تحفيظ قرآن للاطفال

بس خايفه لانهم قالولى دى امانه يعنى لو حفظتهم حكم غلط او نطق غلط هاخد ذنبهم

اكتر حاجة زعلتنى انى مكملتش فى معهد القراءات بس دا لان امتحاناتهم فى نفس توقيت امتحاناتى فتوقفت كنت اتمنى انى اكمل مع والدتى واكون معاها دلوقتى فى معهد الدعاه انا بجد بغبطها جدااا

بالنسبة لهواياتى

بشكر واالدى جدااا لانه اول واحد اكتشف موهبتى الشعريه ......كنت فى مرة ماسكه جرنال لقيت صفحة الادب عجبنى الكلام وكان نفسى اكتب زيه اشمعنى هما وبدأت اكتب اى حاجة تيجى على بالى وكنت اورى لبابا كان بيشجعنى وبيصلحلى اخطائى وبيعلمنى ومن هنا كانت بدايتى كتبت اشعار كتيير جدا وخواطر ونثريات

بشكر حبيبه قلبى اسماء عبد العزيز وهى اول واحده اتبنت موهبه كتاباتى القصصيه وبدأت توجهنى وكل ماكنت اكتب حاجة اوريهالها وهى تظبطهالى بحبهااا جدا ويارب ترجع بالف سلامه لان البلد وحشه من غيرها جدا


عندى موهبه تمثيل رهييييبه واول مرة اعرف دا لما اصحابى دبسونى انى اعمل دور واحده فلاحة ولبست وظبطت نفسى وعملت الدور محدش كان مصدق انى دا انا .....ومن هنا كل مانطع رحله مع المسجد بيحطونى اول القائمه هههه


بعمل عروض جميلة للاطفال فى الحفلات تبع المسجد ......ودربت اصحابى على عروض كنا بنعملها فى حنه اصحابنا وبننشد وكانت فى منتهى الجمال والكل شهد بيها .....كان عايزين نقول ان برضو الافراح الاسلامية جميلة مش كئيبة ومعقده


بالنسبة لشخصيتى

انسانه متزنة فى كل حاجة بعرف امتى اكون قوية وامتى احسس اللى قدامى انى ضعيفه امتى اكون عقلانية وامتى اكون عاطفيه امتى احب وامتى اهجر امتى اكون حازمة وامتى اكون متساهله الخ

.شخصيه صامته جدا وهادية مع الاغراب ورغايه وفرفوشه مع اللى اعرفهم

بحب الناس جدا سعادتى بتكمن انى اشوف حد سعيد بسببى

مبحبش ازعل حد مهما حصل .اى نعم ساعات بخربط فى الكلام لما اكون زعلانة بس بروق بسرعه جدااا وبعتذر

منصته جيده للى بيتكلم

بحب كتير اخد قرار لوحدى عشان اتحمل انا نتيجته بس مفيش مانع لو اخدت برأى ذوى الخبره

بحب اسرح بخيالى كتييييير لكن عقلانية فى نفس الوقت ولو فيه قرار لازم احكم عقلى وتحكيمى لعقلى تعبنى كتيير وانقذنى كتيييير

عندى طوله بال كبيره وصبوره

اكتر حاجة بكرهها انى الاقى اللى قدامى بيستغلنى .واكتر حاجة بتضايقنى ان الناس اللى بحبهم اكتر ناس تتمنالى التعاسه واكتر حاجة توجعنى الكذب والخيانة اكتر حاجة بقدرها الحب والصداقه

... قلبى عمره مايقسى ابدا يمكن وقت الزعل بس وفى ثانية بروق وعمرى فى حياتى ماكرهت حد ولاشلت من حد ومهما عمل فيا عمرى مابدعى عليه .......دموعى قريبه جدااااا ويمكن دا بيحسس اللى قدامى انى ضعيفه

بحب الاطفال ومغرمه بالقعده معاهم بحس انى برجع طفله تانى بفضل اجرى واتنطط والعب جدعه قوى مع كل الناس اللى اعرفها واللى معرفهاش

عنيده محبش حد يفرض عليا راى انا مش مقتنعة بيه لمجرد انه بس يرضى غروره

دمى خفيف بكره النكد موووت احب الفرفشة والدماغ الرايقة على الرغم انى احيانا بكون كئيبة ونكدية

احيانا مش باقدر اسكت على وضع غلط بدافع عن الناس واجيب حقهم من بق الاسد زى مابيقولوا لكن باجى لغاية عندى ومبعرفش اجيب حقى L

حيانا متمردة واحلامى اكبر من قدراتى بتحمس بسرعة وبفقد حماسى بنفس السرعة ومن غير اسباب

متقلبة جداً وهوائية بحب الشتا والجرى تحت المطر بحب الليل ومنظر النجوم والقمر

مرنة جداً يعنى بقدر اتأقلم مع اى ظروف والحمد لله بقدر اكون متفائلة فى ظل اى ظروف

احياناً يكون عبيطة بس بمزاجى كلامى ليه معنى واحد بس .. يعنى مش بعرف اقول كلمة وانا اقصد بيها كلمة تانية وللاسف دايماً الناس بتعاملنى العكس بتعاملنى على اساس انى اقصد معنى تانى


بس اللى عايزة اقولوا ان تغريد بتاعه امبارح غير بتاعه النهارده غير بتاعه بكره

بحس انى كل يوم فى تغير مستمر للافضل دائما


بالنسبة للصداقه

اكتر حاجة سابت اثر فى نفسى انى حبيبت اصحابى جدا جدا وفى الاخر ملقتهمش مخلصين ويمكن أنى من النوع اللى بيحاول يتخطى الازمة بسرعة وبحاول اخرج من كل تجربة مؤلمة بحاجة تخلينى اقوى كان زمانى انهرت نفسيا من كل اللى حصلى

لكن ربنا عوضنى بصديقه بجد ربنا يعزها بحبها جدااااا (امنية محمد ضيف ) صاحبه مدونة كبر دماغك اتعلمنا مع بعض كتير ومهما حصل مبنزعلش وفعلا بنخاف على بعض

مبقتنعش خاالص بفكرة الصداقه بين الولد والبنت

بالنسبة للحب

بقدر الكلمة دى قوى وبديها حقها .....نفسى تتمحى كلمة الفراق من القاموس ...بفرح قوى لما احضر فرح واعرف ان الاتنين كانوا بيحبوا بعض ...وعلى رغم من كل دا اتحبيت كثير لكن عمرى ماحبيت حد عمرى ماسبت لنفسى المساحه انى احب حتى لما اتخطبت كنت خايفه افتحله قلبى وفضل الباب متوارب ...خوفى من خوض التجربه كان بيمنعنى انى اجرب ....خوفى من كلمة الفراق نفسها كانت عائق ....اقولكم على حاجة انا حتى لما كنت افكر انى احب واعيش فى خيالى انى بدأت فى قصه حب مكنتش احب انها تكون سهله يعنى مش هيكون للحب معنى من غير عوائق واحنا نتخطاها عشان نرتبط ويمكن توصل اننا نفترق بس نرجع تانى لبعض بس حتى لو حصل دا وحبيت ومش هكون بالجرأه الكافيه والشجاعه انى اقف قدام اهلى عشان انصر حبى ...على رغم انى .بقف جنب اصحابى قوى وبشجعهم انهم ميضحوش بالساهل قلبى بيبكى لما اشوف دمعه واحده او واحد مش قادرين يكملوا حبهم .....عارفين كمان انا حتى مش عارفه افهم نفسى ان كنت مع او ضد الحب ......لكن بدعى ربنا يرزقنى الزوج الصالح اللى يذيقنى طعم وحلاوة الحب الحلال

بصراحة عندى كلام كتييير وزمانكم دلوقتى بتقولوا ربنا ينتقم من الكفرة يمهل ولايهمل هههههههههه

بعتذررر لاى حد ضافنى على الفيس وانا مقبلتش الاضافه وياريت كلهم يتقبلوا اعتذارى لانى بجد مبضفش شباب غير اخواتى واقرب الاقربين

وكمااااااااان ياريت تسامحونى على تقصيرى معاكم هانت اهو كلها ايام معدودة والامتحانات تخلص

كل سنة وانتم طيبييييين

تحيااااااااتى القلبية للجميع

اختكم فى الله
تغريد احمد

هناك 34 تعليقًا:

Mona Abo - Elso3od يقول...

ربنا ينتقم من الكفرة ههههههههههه
ايه يا سيتي ماكنش اعتراف ده صدعتيني
بس بجد انا مبسوطة بالاعتراف ده و اني عرفتك علي حقيقتك ..............
بجد بقي انتي حد جميل اوي و ان شاءالله ربنا يكرمك في حياتك من كل جانب الشخصي و العملي
و يا رب افرح فيكي قريب

جايدا العزيزي يقول...

تغريد

شخصيه رائعه غاليتى

ومشوار كفاح يستحق الاحترام

جميل ان اتعرفت على شخصيتك المميزة

ربنا يوفقك


كلعام وانت بخير

تحياتى

اعقل مجنونه يقول...

ان شاء الله تحققى كل احلامك فى المستقبل القريب يا قمر
وكل سنه وانتى طيبه كويس انك فكرتنى ان بكره صيام....

محمد التركى يقول...

السلامو عليكم

انا جاى اقولك كل سنه وانتى طيبه
وربنا يجعلها سنه هجريه سعيده علينا يارب

لا تنسينى من دعائك

تحياتى

محمـــد التركـــى

غير معرف يقول...

حسنى مبارك يقدم غاز مصر هدية لدعم إسرائيل و مصر تخسر حوالى 100 مليار دولار فى 20 سنة لأسرائيل !!!

التقت شبكة الإعلام العربية "محيط " مع السفير إبراهيم يسري مساعد وزير الخارجية ومدير إدارة القانون الدولى والمعاهدات الدولية الأسبق بوازرة الخارجية وكان هذا الحوار ...

لعل أزمة الأنابيب الموجودة حاليا حيث يتعذر علي المواطنين الحصول علي احتياجاتهم اليومية من الغاز تثبت بالدليل القاطع لكل الناس فشل سياسة الحكومة بتصدير ثروتنا الطبيعية من الغاز لإسرائيل بأسعار فكاهية دولار وربع للطن المتري في حين أن السعر العالمي اثني عشر دولارا ونصف. وهذا معناه إننا نحرم المصريين مع صباح كل يوم من مبلغ 13 مليون دولار أمريكي يمثل فرق السعر في الوقت الذي يتزايد فيه أعداد العاطلين والفقراء وهو ما يمثل حرمانا للمواطن المصري الفقير والمحتاج من ثروة بلده من الغاز ...

باقى الحوار تحت عنوان ( جدارغزة وتصديرالغاز لإسرائيل إهدار للمصالح المصرية ) فى صفحة الحوادث بالرابط التالى

www.ouregypt.us

Sheroo يقول...

حلوة أوى بجد يا تغريد التدوينة دى
أنا بفكر اعمل زيك
وأكتب تدوينة فيها إعترافات عن نفسى
فكرة بجد حلوة
وهوصل منها لنتيجة كويسة اوى
برافو عليكى

كلام من قلبي يقول...

ازيك يا قمر
كلامك حلو اوي وشخصيتك جميلة
وموزونة ودي من الشخصيات الحلوة البيكون التعامل معاهم سهل

سندباد يقول...

شكرا ليكي انك سمحتيلينا نتعرف علي ضخصيتك
اعترافات خطيرة
كل سنة وانتي بخير
تقديري واحترامي

ترانيم يقول...

ربنا يحميك يا تغريد لو فيه 100 بنت زيك يبقى ضمنا الجيل الجديد يطلع ممتاز لان لو كل بنت علمت 100 نفس افكارك وطموحاتك هنكسب جيل كله طموح ربنا يكرمك يا رب

eng_semsem يقول...

احلى اعترافات في الدنيا بس كلها ضد بعض انت بجد نفسك في كل حاجه حلوه وده مش موجود على سطح الارض كئيبه ونكديه وبتحبي الفرح ازاي ده بقى وبعدين كلنا بنزعل وكلنا بنفرح ماتشيليش هم زياده عن حقه وكل موضوع ياخد بس وقته وربنا يرزقك بابن الحلال اللي ماتبقيش عنيده معاه وربنا يوفقك في دراستك وفي تحقيق احلامك

adel يقول...

اكتبي رقم البطاقة بالمرة :)

صحيح في حاجات فكريا مش متفقين فيها بس لولا اختلاف الاذواق :)
لذيذ

افروديت يقول...

واضح أنك شخصيه جميله ومرحةيبقي ليه دموع بقي ممكن نقول أنك قمر من غيردموع

بتعرفي تمثلي بجد برافو عليكي أنت هتقطعي علينافي الصحافه وكمان هتمثلي

تحياتي ليكي وبجدتدبيسه حلوة اللي عرفتنابيكي

karmen يقول...

جميل اننا اتعرفنا عليك كتر حبي
شرف لي معرفه اجمل بنوته
بوسة لك حبي
تحياتي

حاجات جوايا يقول...

ربنا يعينك يا قمر
حلوة اوى الاعترافات دى
انسانة جميلة انتى
ربنا يوفقك يا حبيبتى
وينتقم من الكفرة يارب
:)
تحياتى

موجة يقول...

ايه السيرة الذاتية الرائعة دى
ربنا يكملك دراستك على خير انشاء الله وتبقى اعلامية كبيرة نسمع عنك ونشوفك فى التفزليون
وتحققى كل ماتتمنى انشاء الله
يابنت بلدى يا سكرة
الا صحيح انتى فى الزقازيق فى الشرقية ولا فين عاوزة اعرف عشان اشوفك

salwa يقول...

السلام عليكم
واضح جدااااا انك شخصية محترمة بكل ما في الكلمة من معنى
الله يوفقك و يحقق لك كل امنياتك
و عام هجري مبارك لكل الامة امين يا رب العالمين

مدونة رحلة حياه يقول...

السلام عليكم
جميلة صراحتك

ماجد القاضي يقول...

ما شاء الله.. كميات معلومات تدل - في رايي على الأقل- على أنك إنسانة عفوية جدا.. حساسة جدا..
بس بجد بحييكي على إيجابيتك وحبك لدينك ورغبتك في نفع الآخرين.. صفات رائعة ربنا يديمها عليكي...
ربنا ييسرلك أمورك في الدراسة والعمل..
ربنا يرزقك الزوج الصالح اللي يستحقك... آمين.

تحياتي أختي الكريمة.

Noha Saleh يقول...

بجد اعترافاتك عرفتنا اكتر على شخصيتك الجميلة
احلى حاجة فى التاجات انها بتعرف المدونين على بعض وخصوصا انهم بيتكلموا بكل صراحة
ربنا يوفقك ويحققلك كل اللى تتمنيه

MaNoO يقول...

شخصيتك مميزه وبتحمل حاجات كتير مختلفه وسرعه التاقلم والمرونه اللى انتى فيها بتخلى الناس تفتكر انك بتجاملى او بتتعاملى بغير شخصيتك لكنهم فعلا مش فاهمين انها مرونه لتسهيل الحياه
انا بفترض على فكره الكلام لانى بقايل المشكله دى فى شخصيتى
ربنا يحفظك ويحققلك كل اللى بتتمنيه

Dr/ walaa salah يقول...

ايه الشخصيه الجميله دي يا تغريد

انتي عسوله اوي وبينتي حاجات كتير اوي في شخصيتك

عارفه انتي عامله زي الفراشه في طباعك

لفت نظري اوي حبك للأطفال وتعلمك للقرآن

وايضاً موضوع الافراح الاسلاميه

صدقيني مفيش اجمل منها كفايه انها بتتعمل وربنا ان شاء الله يكون راضي عنها

انا سعيده اوي بمعرفتي بإنسانه جميله زيك

R-H-S يقول...

كل سنة وانتى طيبة

iـــــــــــsــــــــــlــــــــــــaـــــــــm يقول...

انا سعيد اوى انك عرفتينا بغض الاشياء عن شخصيتك
انتى انسانه موهوبه ومجتهده ربنا يوفقك
وانا سعيد بصداقتك
واتمنالك دايما السعاده والتوفيق
وانا قلتهالك قبل كده وهقولها تانى
انا بتنبألك بمستقبل باهر
ربنا يوفقك
ومزيد من الابداع والتقدم دايما يارب
تحياتى

المتبهـدلـون فـي الأرض يقول...

يااه قريت كل ده ..
بس صعب قوي الواحد يحلل شخصية نفسه .. وغالبا انطباعه عن نفسه ممكن يغاير انطباع الناس عنه .. عمومن الثقة بالنفس حلوة برده D:-
وربنا يديم عليكي أصدقاء تحبيهن ّ
(على فكرة حفلات المسجد دي رووعة .. غير أي مكان تاني)

خواطري مع الحياة يقول...

السلام عليكم
تعرفنا على اجمل شخصية
بنوتة طيبة وفيها روح الطموح
ربنا يوفقك يارب
وتحققي كل امانيك يارب
تقبل مروري
سلامي لاجمل وارق بنوتة.

سفيرة المحبه يقول...

احلى اعترافات من احلى قمر مااشاء الله
وفقك الله حبيبتي
تحيااتي لكـ

ماجد القاضي يقول...

مممممممممممممم!!!
إعلام.. صحافة.. دبلومة صحة نفسية.. مدربة تنمية بشرية.. تعلم إشارات الصم والبكم.. فريق أنوار.. حلقة تحفيظ قرآن للأطفال.. معهد قراءات.. موهبة شعرية..

كتابة قصصية.. تمثيل..عروض أطفال..."
إيه الرعب ده؟!!!
ما شاء الله لا قوة إلا بالله..
ده مش حسد... ده غبطة والله!
بجد ربنا يزيدك نشاط وأمل ومهارة وعزيمة وحب للخير.. والأهم القدرة على التوازن بين كل ده....
أرجوك أختي الكريمة... خلصي كل طموحاتك وأحلامك قبل ما ييجي اللي هينسفهم.... الزوج والعيال!!!

"بس اللى عايزة اقولوا ان تغريد بتاعه امبارح غير بتاعه النهارده غير بتاعه بكره"
المعنى ده مهم جدا... جميل قوي إنك منتبهة ليه...

"مبقتنعش خاالص بفكرة الصداقه بين الولد والبنت"
معاكي تماما...

مستغرب من كيفية تعاملك مع الحب!!!!
أعرف واحدة لها نفس المنهج الغريب ده... بتخاف تحب علشان بتخاف من الفراق!!!!!!
استبشري خير يا أختي الكريمة... وغذا جاءتك فرصة الحب فاقتنصيها.. طبعا الحب الحلال (في الإطار الشرعي).. والخلاصة هي ما قلتيه..."بدعى ربنا يرزقنى الزوج الصالح اللى يذيقنى طعم وحلاوة الحب الحلال"... آمين يا رب... طالما أمنيتك بهذا النبل وهذا النقاء فحق على الله أن يجيبك.. (وده بنص الحديث وليس تأولا على الله).

رووووحي يا شيخة.. إلهي وانت جاهي تغمضي عين وتفتحيها تلاقي الامتحانات خلصت ونجحتي كمان... :)

تحياتي على هذا الصدق في التعبير.

غير معرف يقول...

Thanks a lot Ms. Taghreed this is a very important confession to me that doesn't gimme the chance to nagging you thanks a lot

El-Kholy

Casper يقول...

اعترافات قوية جدا ان دلت فتدل على شخصية متزنة جدا

========

بالتوفيق لكِ دائما
خالص تقديري واحترامي

تقبلي مروري
Casper

غير معرف يقول...

حببتى توتو ربنا يااااااارب يكرمك بحبه وحب من احبه حب كل عمل يقربك إليه
كل اعتراف منك على الملىء انى صدقتك الى ربنا من عليكى بيها لا والله
ده فضل من ربنا عليا بجد انه من عليا بيكى يارب أكون عند حسن ظنك ديما
ويااااااارب يكرمنا اننا نتجمعا ديما على حب ربنا ونحقق احلمنا يااارب
بحـــــــــــبك
مواااااااااااااااه
أمنيه ضيف

شمس النهار يقول...

بوست تدبيسه بصراحه
:))

بس جه مصلحه لينا عرفناكي اكتر

كل سنه وانتي طيبه
وان شاء الله تنجحي وتخلصي وتحققي كل احلامك

MOHAMMED ELBANNA يقول...

همسات
رااااائعه يا همسات هذه الفضفضه .
أشعد الله أيامك كلها وحقق لكي أحلامك .
تحياتي
محمد البنا

اسماء عبدالعزيز يقول...

حبيبة قلبي توتا الجميلة
اكيد انتِ عارفه رايي فيكِ وانك اجمل بنوته قابلتها واعز صديقه على قلبي
اعترفاتك جميلة زيك وتنم عن شخصك المتزن
نسيتي تقولى فى عيونك بريق العفه والروعه والجمال

حبيبة قلبي .. كنت بجوارك وسأظل هكذا لانك اولا منى .. وعشان لاقيتك حد كويس اوى .. و فعلا موهبه حقيقة وطاقة وانا متأكده انه مازال بداخل تغريد احمد الكاتبه الرقيقة الكثير والكثير من الابداع الحقيقى .. وعلى المدى القريب بأمر الله
ستصلين لمبتغاكِ
اسعد الله ايامك
وكل سنه وانتِ طيبه ياقمرى وجعله الله عام النجاح والتوفيق واعطاكِ ما تتمنى
بحبك اوى ياتوتا

Sheroo يقول...

http://sheroo-cinderella.blogspot.com/