اعترافات بنوتة

التدبيسة دى جاتلى من اسماء عبد العزيز صاحبه مدونة امنحينى عذرا طبعا انا مقدرش ارفضلها طلب لانها اعز صديقاتى ربنا يخليها ليا
الصراحة انا من عارفه اكتب ايه بس كتبت كل اللى جه على بالى انا رغاية بقى واستحمولوا ههههههههه

بالنسبة لدراستى:

انا فى رابعه اداب اعلام قسم صحافه انا كنت علمى رياضه وكان هدفى انى ادخل هندسة لكن ربنا مأردش دخلت كلية الاداب وكان املى انى ادخل قسم علم نفس لانى بحبه جدا كان طموحى انى احضر الماجستير بس اكتشفت انه مينفعش فدخلت اعلام حسيت انها حاجة كبيره الدراسه جمييلة وسلسه مع الدكاترة السلسين ...لكن عندنا دكاترة اعوذ بالله والحمد لله ربنا وفقنى ووصلت لسنه رابعه وعقبال كدا مااخلص خالص القسم صعب جدا فى مذاكرة مواده لانه كلها كلام اكاديمى ونظرى بحت

بالنسبة لتدريبى او شغلى

انا بقالى 3 سنين فى مجال الصحافه اشتغلت فى اخبار الشرقيه واخبار الشرقيه اليومية وبانوراما اخبار الشرقيه واخييييرا اشتغلت فى صوت الوفد وانا فيه حاليا لكن لسه انا فى مرحله لدراسه سياسيه الجرنال جالى شغل فى القاهرة لكن اهلى مرضيوش

بالنسبة لطموحاتى

ان شاء الله هحضر دبلومة فى الصحه النفسية _ واكمل فى مشوارى عشان اكون مدربه تنمية بشرية _ واتمنى انى انشر كل كتاباتى _ بسعى دائما للتعلم كى اكون زوجة تقيه وام مثاليه _اتعلم اشارات الصم والبكم وان فعلا فريق انوار رساله ههيا يقوم على ارض صلبه لاننا بيه هنسعى لتغيير فكر مجتمعنا توسيع مداركهم واكسابهم مهارات جديده _ وان فريق تيم كنوز واللى اانا عضوة فيه يكون من اكفأ الفرق فى الشرقيه

نفسى اعمل حلقه تحفيظ قرآن للاطفال

بس خايفه لانهم قالولى دى امانه يعنى لو حفظتهم حكم غلط او نطق غلط هاخد ذنبهم

اكتر حاجة زعلتنى انى مكملتش فى معهد القراءات بس دا لان امتحاناتهم فى نفس توقيت امتحاناتى فتوقفت كنت اتمنى انى اكمل مع والدتى واكون معاها دلوقتى فى معهد الدعاه انا بجد بغبطها جدااا

بالنسبة لهواياتى

بشكر واالدى جدااا لانه اول واحد اكتشف موهبتى الشعريه ......كنت فى مرة ماسكه جرنال لقيت صفحة الادب عجبنى الكلام وكان نفسى اكتب زيه اشمعنى هما وبدأت اكتب اى حاجة تيجى على بالى وكنت اورى لبابا كان بيشجعنى وبيصلحلى اخطائى وبيعلمنى ومن هنا كانت بدايتى كتبت اشعار كتيير جدا وخواطر ونثريات

بشكر حبيبه قلبى اسماء عبد العزيز وهى اول واحده اتبنت موهبه كتاباتى القصصيه وبدأت توجهنى وكل ماكنت اكتب حاجة اوريهالها وهى تظبطهالى بحبهااا جدا ويارب ترجع بالف سلامه لان البلد وحشه من غيرها جدا

عندى موهبه تمثيل رهييييبه واول مرة اعرف دا لما اصحابى دبسونى انى اعمل دور واحده فلاحة ولبست وظبطت نفسى وعملت الدور محدش كان مصدق انى دا انا .....ومن هنا كل مانطع رحله مع المسجد بيحطونى اول القائمه هههه

بعمل عروض جميلة للاطفال فى الحفلات تبع المسجد ......ودربت اصحابى على عروض كنا بنعملها فى حنه اصحابنا وبننشد وكانت فى منتهى الجمال والكل شهد بيها .....كان عايزين نقول ان برضو الافراح الاسلامية جميلة مش كئيبة ومعقده

بالنسبة لشخصيتى

انسانه متزنة فى كل حاجة بعرف امتى اكون قوية وامتى احسس اللى قدامى انى ضعيفه امتى اكون عقلانية وامتى اكون عاطفيه امتى احب وامتى اهجر امتى اكون حازمة وامتى اكون متساهله الخ

.شخصيه صامته جدا وهادية مع الاغراب ورغايه وفرفوشه مع اللى اعرفهم

بحب الناس جدا سعادتى بتكمن انى اشوف حد سعيد بسببى

مبحبش ازعل حد مهما حصل .اى نعم ساعات بخربط فى الكلام لما اكون زعلانة بس بروق بسرعه جدااا وبعتذر

منصته جيده للى بيتكلم

بحب كتير اخد قرار لوحدى عشان اتحمل انا نتيجته بس مفيش مانع لو اخدت برأى ذوى الخبره

بحب اسرح بخيالى كتييييير لكن عقلانية فى نفس الوقت ولو فيه قرار لازم احكم عقلى وتحكيمى لعقلى تعبنى كتيير وانقذنى كتيييير

عندى طوله بال كبيره وصبوره

اكتر حاجة بكرهها انى الاقى اللى قدامى بيستغلنى .واكتر حاجة بتضايقنى ان الناس اللى بحبهم اكتر ناس تتمنالى التعاسه واكتر حاجة توجعنى الكذب والخيانة اكتر حاجة بقدرها الحب والصداقه

... قلبى عمره مايقسى ابدا يمكن وقت الزعل بس وفى ثانية بروق وعمرى فى حياتى ماكرهت حد ولاشلت من حد ومهما عمل فيا عمرى مابدعى عليه .......دموعى قريبه جدااااا ويمكن دا بيحسس اللى قدامى انى ضعيفه

بحب الاطفال ومغرمه بالقعده معاهم بحس انى برجع طفله تانى بفضل اجرى واتنطط والعب جدعه قوى مع كل الناس اللى اعرفها واللى معرفهاش

عنيده محبش حد يفرض عليا راى انا مش مقتنعة بيه لمجرد انه بس يرضى غروره

دمى خفيف بكره النكد موووت احب الفرفشة والدماغ الرايقة على الرغم انى احيانا بكون كئيبة ونكدية

احيانا مش باقدر اسكت على وضع غلط بدافع عن الناس واجيب حقهم من بق الاسد زى مابيقولوا لكن باجى لغاية عندى ومبعرفش اجيب حقى L

حيانا متمردة واحلامى اكبر من قدراتى بتحمس بسرعة وبفقد حماسى بنفس السرعة ومن غير اسباب

متقلبة جداً وهوائية بحب الشتا والجرى تحت المطر بحب الليل ومنظر النجوم والقمر

مرنة جداً يعنى بقدر اتأقلم مع اى ظروف والحمد لله بقدر اكون متفائلة فى ظل اى ظروف

احياناً يكون عبيطة بس بمزاجى كلامى ليه معنى واحد بس .. يعنى مش بعرف اقول كلمة وانا اقصد بيها كلمة تانية وللاسف دايماً الناس بتعاملنى العكس بتعاملنى على اساس انى اقصد معنى تانى

بس اللى عايزة اقولوا ان تغريد بتاعه امبارح غير بتاعه النهارده غير بتاعه بكره

بحس انى كل يوم فى تغير مستمر للافضل دائما

بالنسبة للصداقه

اكتر حاجة سابت اثر فى نفسى انى حبيبت اصحابى جدا جدا وفى الاخر ملقتهمش مخلصين ويمكن أنى من النوع اللى بيحاول يتخطى الازمة بسرعة وبحاول اخرج من كل تجربة مؤلمة بحاجة تخلينى اقوى كان زمانى انهرت نفسيا من كل اللى حصلى

لكن ربنا عوضنى بصديقه بجد ربنا يعزها بحبها جدااااا (امنية محمد ضيف ) صاحبه مدونة كبر دماغك اتعلمنا مع بعض كتير ومهما حصل مبنزعلش وفعلا بنخاف على بعض

مبقتنعش خاالص بفكرة الصداقه بين الولد والبنت

بالنسبة للحب

بقدر الكلمة دى قوى وبديها حقها .....نفسى تتمحى كلمة الفراق من القاموس ...بفرح قوى لما احضر فرح واعرف ان الاتنين كانوا بيحبوا بعض ...وعلى رغم من كل دا اتحبيت كثير لكن عمرى ماحبيت حد عمرى ماسبت لنفسى المساحه انى احب حتى لما اتخطبت كنت خايفه افتحله قلبى وفضل الباب متوارب ...خوفى من خوض التجربه كان بيمنعنى انى اجرب ....خوفى من كلمة الفراق نفسها كانت عائق ....اقولكم على حاجة انا حتى لما كنت افكر انى احب واعيش فى خيالى انى بدأت فى قصه حب مكنتش احب انها تكون سهله يعنى مش هيكون للحب معنى من غير عوائق واحنا نتخطاها عشان نرتبط ويمكن توصل اننا نفترق بس نرجع تانى لبعض بس حتى لو حصل دا وحبيت ومش هكون بالجرأه الكافيه والشجاعه انى اقف قدام اهلى عشان انصر حبى ...على رغم انى .بقف جنب اصحابى قوى وبشجعهم انهم ميضحوش بالساهل قلبى بيبكى لما اشوف دمعه واحده او واحد مش قادرين يكملوا حبهم .....عارفين كمان انا حتى مش عارفه افهم نفسى ان كنت مع او ضد الحب ......لكن بدعى ربنا يرزقنى الزوج الصالح اللى يذيقنى طعم وحلاوة الحب الحلال

بصراحة عندى كلام كتييير وزمانكم دلوقتى بتقولوا ربنا ينتقم من الكفرة يمهل ولايهمل هههههههههه

بعتذررر لاى حد ضافنى على الفيس وانا مقبلتش الاضافه وياريت كلهم يتقبلوا اعتذارى لانى بجد مبضفش شباب غير اخواتى واقرب الاقربين

وكمااااااااان ياريت تسامحونى على تقصيرى معاكم هانت اهو كلها ايام معدودة والامتحانات تخلص

كل سنة وانتم طيبييييين

تحيااااااااتى القلبية للجميع

اختكم فى الله
تغريد احمد